Qasym-Jomart Toqaev ınfraqurylym josparyn qaıta qaraýdy tapsyryp, muny sapaly ázirleý keregin aıtty. Oıǵa kelgenniń bárin qujatqa qosyp, búdjetten qarjy bólinbedi deý - qoldan túk kelmeıtinin moıyndaý ekenin de qadap aıtty, - dep habarlaıdy Dalanews.kz.

Prezıdent tek asa qajet bolǵan jaǵdaıda ǵana qarjylaı qoldaý sharalaryn qarastyrǵan jón ekenin aıtty.

"Elden zańsyz shyǵarylǵan aktıvterdi qaıtarý ınvestısıanyń taǵy bir qaınar kózi bolýǵa tıis. Men bul sharýanyń baǵyt-baǵdary týraly birneshe ret aıtqan bolatynmyn. Bıznes ókilderimen kezdesýlerde de osy máselege toqtaldym. Ýákiletti qurylymdar jumysty jandandyrýy kerek. Túsken qarajatty elimiz úshin mańyzy zor jobalardy júzege asyrýǵa paıdalaný qajet. Alaıda, ózge de quqyq qorǵaý organdary júgensizdikke jol bermeýge tıis. Taǵy da eskertemin, "shash al dese, bas alyp", asyra siltemeý kerek. Men mundaı jónsiz árekettiń qaı-qaısysyn da qatań aıyptaımyn.

Bizdiń basty mindetimiz – kásipkerlerdiń erkindigin shekteý emes, kerisinshe, elimizde bızneske jáne ınvestısıaǵa jaıly orta qalyptastyrý. Bul jumystyń áleýmettik ádildikti qamtamasyz etý turǵysynan aıryqsha máni bar. Mańyzdy ekonomıkalyq mindetti oryndaýdy kózdeıtin osy bastamany eshkimniń joqqa shyǵarýyna jol berilmeıdi", - dedi Prezıdent.