Keiingi ýaqytta áleýmettik jeliler men kóshedegi taqtaishalarda “Sergek” júiesi arqyly tirkelgen aiyppuldardy joiýdy usynyp, zańsyz qyzmet kórsetetinder kóbeigen. Almaty qalalyq politsiia departamenti mundai jarnamalarǵa senbeýge shaqyrdy, dep habarlaidy Dalanews.kz 31 arnaǵa silteme jasap.
Máselen, Almatydaǵy Alǵabas yqshamaýdanynda “aiyppuldan aryltamyn” degen habarlandyrýlar ashyq ilinip, bailanys nómirleri kórsetilgen. Dál osyndai mazmundaǵy jazbalar internette de jii kezdesedi.
Alaiaqtar bul qyzmet úshin 10–15 myń teńge kóleminde aqy suraidy. Olardyń aitýynsha, “Sergek” arqyly kelgen aiyppuldy 62 kúnnen keiin óshirýge bolady, tek osy merzimde eshqandai resmi habarlama kelmeýi kerek eken. Tipti kelgen jaǵdaida da “jolyn tabýǵa” ýáde beredi.
Alaida politsiia bul árekettiń zańsyz ekenin, ári ol alaiaqtyqqa jatatynyn qatań eskertedi.
“Mundai jarnama shyndyqqa janaspaidy. Bul – zańǵa qaishy. Qazir barlyq aqparattyq júieler biryńǵai jáne avtomattandyrylǵan. Adami faktor múlde joq. Iaǵni eshkim aiyppuldy óshire almaidy. Mundai derekter boiynsha birneshe ret tekserýler júrgizilip, tiisti sharalar qabyldandy”, – deidi Almaty qalalyq politsiia departamentiniń resmi ókili Saltanat Ázirbek.
Quzyrly organ azamattardy qyraǵy bolýǵa, kúmándi usynystarǵa aldanbaýǵa shaqyryp otyr. Aiyppuldy joiýdyń jalǵyz joly — ony zańdy túrde tóleý.
