Semeide bir top jasóspirimnen álimjettik kórgen 6-synyp oqýshysy baspanaly boldy, dep habarlaidy Dalanews.kz.
Bul týraly semeilik bloger Aida Júnisova málimdedi. Aitýynsha, halyq 3 kúnde 32 million teńge jinap, páterli bolýyna atsalysqan.
Ol páterdi resmi túrde tirkep, onyń kilti men qujatyn balaǵa tabystaǵan sátti kópshilikke kórsetti.
Aita keteiik, buǵan deiin Semeide bir top jasóspirim 6-synyp oqýshysyn jabylyp tepkiniń astyna alǵan edi. Sonymen qatar ony qorlap, músheqap úrletip, videoǵa túsirgen.
Qazir politsiia bolǵan oqiǵa boiynsha qylmystyq is qozǵady.
Osy jaǵdaiǵa bailanysty mektep direktory jumystan bosatyldy.
Al álimjettik kórsetken balalar arnaiy mektepterde oqityndy boldy.
Sonymen qatar ótken jyly jańa jyldyq shyrshany bezendirý kezinde 23 jastaǵy muǵalim biikten qulap, aýyr jaraqat alǵan edi. Ol biraz ýaqyt tósek tartyp jatyp qaldy. Tekserý barysynda Eńbek inspektsiiasy jumys berýshiniń kinásin tolyq dáleldedi. Sóitip jumys berýshi zardap shekken pedagogtyń em-dom kezeńindegi jalaqysyn tolyq tóleýge jáne emge jumsaǵan shyǵyndaryn óteýge mindetteldi.
Osy tusta belgili ustaz, Qazbilim jobasynyń avtory Aiatjan Ahmetjanuly atalǵan jaǵdaiǵa bailanysty pikir bildirip, máseleniń túp-tamyry tereńde jatqanyn aitty.
“Men ol jerden eshteńe kútpedim. Sebebi qala ákimi men bilim bólimi basshysynyń muǵalimge álimjettik jasaýynan muǵalim shyrshadan ushyp ketip, jaralandy emes pe? Dál sondailar toqtaǵanda ǵana oqýshylar arasyndaǵy álimjettik te toqtaýy múmkin”, - deidi ol.
Onyń aitýynsha, qoǵamdaǵy qatygezdik pen zorlyq-zombylyq eresekterdiń bir-birine kórsetetin qarym-qatynasynan bastaý alady.
“Aýyrlaý shyǵar. Biraq agressiia agressiiany týdyrady. Ákimshiliktiń muǵalimge kórsetken agressiiasy — muǵalimniń oqýshyǵa agressiiasyn týdyrady. Muǵalim men ata-ananyń balaǵa kórsetken agressiiasy — olardyń júregin qataityp, bir-birine agressiiasyn týdyrady.
Úiinde ata-anasy balasynyń kózinshe boqtyq sózdi erkin qoldanyp, aýyr sózder aitatyn bolsa, bala úshin bul qalypty jaǵdaiǵa ainalady. Mundai ortada ósken bala boqtaýdy da, tóbelesti de, álimjettikti de qalypty qubylys retinde qabyldaidy. Óitkeni balapan uiada ne kórse, ushqanda sony iledi”, — dep qosty ol.
Ustaz bul oqiǵanyń qoǵamdy dúr silkindirgenimen, shyn máninde jabýly kúiinde qalyp jatqan jaǵdailardyń áldeqaida kóp ekenin aitty.
Sonymen qatar Oqý-aǵartý ministrligi de únsiz qalmady.
“Sońǵy kúnderi buqaralyq aqparat quraldary men áleýmettik jelilerde Semei qalasynda jasóspirimderdiń kámeletke tolmaǵan balaǵa kúsh kórsetkeni túsirilgen beinejazba keńinen taralýda. Bul jaǵdaidy odan ári ýshyqtyrmaý jáne balaǵa qosymsha moraldyq ziian keltirmeý úshin atalǵan beinematerialdy taratýdy toqtatýǵa shaqyramyz. Erekshe alańdaýshylyq týdyratyn jait – keibir blogerler zardap shekken balanyń fotosýretterin jariialaýda. Mundai áreketter balanyń psihologiialyq jaraqatyn tereńdete túsedi”, - dep jazylǵan ministrlik málimdemesinde.
Vedomstvonyń málimetinshe, Balalardyń quqyqtaryn qorǵaý komiteti bul isti jiti baqylaýda ustap otyr.
“Kináliler jaýapkershilikke tartyldy. Oqiǵa ornynda Bala quqyqtary jónindegi óńirlik ýákil jumys isteýde. Barlyq kámeletke tolmaǵan azamattardyń quqyqtary memlekettik deńgeide qorǵalǵan jáne kepildendirilgen.
Eske salamyz, QR "Buqaralyq aqparat quraldary týraly" zańynyń 14-baby, 5-tarmaǵyna sáikes, zardap shekken balalardyń jeke basyna qatysty jáne biometriialyq derekterin, onyń ishinde olardyń fotosýretteri men jeke basyn anyqtaýǵa múmkindik beretin kez kelgen aqparatty taratýǵa tyiym salynady”, - dep qosty ministrlik.
