Jeke kásipker Sherzad Nishanovtyń demeýshiligimen boi kótergen jańa meditsinalyq ortalyq 70 tósek-orynǵa laiyqtalǵan. Investitsiia kólemi 120 mln teńge. Emdeý mekemesi fizioterapiia, ishek joldaryn tazartý, nevrologiialyq jáne júrek emdeýge qajetti zamanýi úlgidegi meditsinalyq jabdyqtarmen tolyq qamtamasyz etilgen.
«Ál Kaýsar» meditsina-saýyqtyrý ortalyǵynyń ashylýyna oblys ákimi Ómirzaq Shókeev pen Túrkistan oblysyna is-sapary aiasynda Qazaqstan halqy Assambleiasy Tóraǵasynyń orynbasary Marat Ázilhanov arnaiy qatysty. Kópultty Sairam aýdanynda ashylǵan jańa meditsina-saýyqtyrý ortalyǵynda 35 adam turaqty jumyspen qamtylǵan.
Oblys ákimi Túrkistan oblysynda qarqyndy damyǵan meditsina salasynyń jetistikterine toqtalyp, memlkettik-jekemenshik seriktestik aiasynda boi kótergen meditsinalyq mekemelerdiń sany artqanyn atap ótti.
– Meditsina salasyna tartylǵan investitsiia kólemi kún sanap artýda. Jekemenshik klinikalar Ordabasy aýdanynda, Kentaýda, Shardara aýdanynda salynyp jatyr. Meditsina salasyn damytýǵa jan-jaqty kúsh salynady, – dedi oblys ákimi.
M.Ázilhanov Táýelsizdiktiń 30 jyldyǵy Assambleia jumysynda úlken ózgerister bolǵan jylmen tuspa-tus kelgenin atap ótti. Qazaqstannyń Tuńǵysh Prezidenti – Elbasy Nursultan Ábishuly Nazarbaev Assambleianyń Qurmetti Tóraǵasy bolyp, ony basqarý quqyǵyn Qazaqstan Respýblikasynyń Prezidenti Qasym-Jomart Kemeluly Toqaevqa tapsyrdy. Memleket basshysy Qazaqstannyń kópetnosty halqyn bolashaǵy birtutas ultqa biriktirý – etnosaralyq qatynastar salasyndaǵy basty mindet ekenine airyqsha nazar aýdardy.
– Túrkistan oblysynda birneshe kezdesý ótkizdik. Dál qazir keremet meditsina ortalyǵyn ashyp jatyrmyz. Halyqtyń jaǵdaiyn jaqsaratatyn, kómek kórsetetin osyndai úlken meditsina ortalyǵy ashylyp jatyr eken. Qutty bolsyn. Oblys ákimi Ómirzaq Estaiuly jergilikti halyqtyń eńbekqorlyǵyna erekshe toqtaldy. Bul jerde kóptegen halyqtar mekendeidi. Baiqaǵanym, barlyǵynyń moinynda bir jumys bar. Kásip bar. Úlgi bolarlyq is, – dedi Qazaqstan halqy Assambleiasy Tóraǵasynyń orynbasary Marat Ázilhanov.
Túrkistan oblysy halqynyń quramy sanalýandyǵymen erekshelenedi, óńirde 50-den astam etnostar men etnostyq toptardyń ókilderi turady.
Oblysta 11 etnomádeni birlestik (ózbek, slavian, túrik, kúrd, iran, tájik, sheshen-ingýsh, tatar-bashqurt, ázerbaijan, grek, «Yntymaq» etnosaralyq etnomádeni birlestigi) bar, aýdandar men qalalarda 7 filial jáne 14 ókildik jumys isteidi.
