Halyqaralyq Túrki akademiiasy Ǵylymi keńesiniń 5-otyrysyna Túrki memleketteri uiymynyń (TMU) Bas hatshysy Baǵdad Ámireev, Halyqaralyq Túrki akademiiasynyń prezidenti Darhan Qydyráli, Ázirbaijan Respýblikasynyń Bilim ministri Emin Amrýllaev, Qyrǵyz Respýblikasynyń Bilim jáne ǵylym ministri Almazbek Beishenaliev, Qazaqstan Respýblikasynyń Bilim ministri Ashat Aimaǵambetov, sondai-aq TMU elderiniń elshileri qatysty. Jiynǵa qatysýshylar Keńestiń jańa basshysyn sailady, sonymen qatar bilim jáne ǵylym salasyndaǵy yntymaqtastyq qarym-qatynas máselelerin talqylap, Túrki akademiiasynyń ǵylymi jobalarynyń baǵyttary men 2022 jylǵa arnalǵan is-sharalardyń josparyn bekitti. Túrkitildes bes memlekettiń ǵalymdaryn biriktiretin eń bedeldi halyqaralyq ǵylymi uiymnyń Ǵylymi keńesin alǵash ret Qazaqstan ókili, QR Ǵylym jáne joǵary bilim ministri Saiasat Nurbek basqarady.
– Túrki álemi óziniń uly ǵalymdaryn, sáýletshilerin, aqyndaryn, sazgerlerin maqtan tutady. Sonymen birge Uly Dala ejelden Eýraziia aýmaǵyndaǵy integratsiialyq protsesterde sheshýshi ról atqardy. Kóshpeli órkeniettiń arqasynda Batys pen Shyǵys halyqtary ózara bilimmen jáne tehnologiiamen almasý múmkindigine ie boldy. Búgin biz ataqty ǵalym, aǵartýshy, memleket qairatkeri, qazaq til bilimi men ádebiettaný ǵylymynyń negizin qalaýshy, Ulttyń uly ustazy Ahmet Baitursynulynyń esimin abyroimen eske alamyz, ol búkil sanaly ǵumyryn túrki memleketteriniń álemdik keńistikte laiyqty oryn alýyna arnady, – dedi Saiasat Nurbek.
Ǵylymi keńes otyrysynda bilim ministrleri aldaǵy ýaqytta túrki álemi týraly oqýlyqtardy jaryqqa shyǵaratyn bolyp kelisti. Atap aitqanda, «Jalpy túrki tarihy», «Túrki áleminiń geografiiasy» jáne «Jalpy túrki ádebieti» oqýlyqtary túrki elderi ǵalymdarynyń ǵylymi eńbekteri men zertteýleri arqasynda kópshilikke tanymal bolǵan biregei derekkózder negizinde túrki álemi týraly ortaq túsinik qalyptastyratyn bolady.
Dál osy kúni Ahmet Baitursynulynyń 150 jyldyq mereitoiyna arnalǵan konferentsiia Nazarbaev Ýniversitetinde ótip, atalmysh jiyn barysynda Halyqaralyq Túrki akademiiasy daiyndaǵan birqatar basylymdardyń tusaýkeseri boldy.
