Almatydaǵy eń iri saýda oryndarynyń biri – «Baisat» kóterme-bólshek saýda ortalyǵynyń bir bóligi satylmai qalsa, Almaty ákimdiginiń kommýnaldyq menshigine berilýi múmkin. Bul týraly QR Qarjy ministrligi Memlekettik múlik jáne jekeshelendirý komitetiniń tóraǵasy Nurmahan Ádilbekov málimdedi, dep habarlaidy dalanews.kz.
Nurmahan Ádilbekovtiń aitýynsha, buryn memleketke qaitarylǵan «Baisat» naryǵyn satý ázirge nátije bermegen. Onyń sózinshe, nysanǵa qyzyǵýshylyqtyń tómen bolýy suranystyń joqtyǵymen nemese mundai kólemdegi aktivke qarjy salýǵa daiyn investorlardyń tapshylyǵymen bailanysty.
«Eger nysandy saýda-sattyq arqyly ótkizý múmkin bolmasa, bolashaqta ony Almaty qalasy ákimdiginiń kommýnaldyq menshigine berý máselesi qarastyrylýy múmkin», – dedi komitet tóraǵasy.
Baǵasy tómendetilse de satylmady
Memlekettik múlik komitetiniń málimetinshe, «Baisat» kóterme-bólshek saýda ortalyǵy birneshe ret aýktsionǵa shyǵarylǵan. Alaida bastapqy baǵa kezeń-kezeńimen tómendetilgenine qaramastan, nysanǵa satyp alýshy tabylmaǵan.
Qaitarylǵan aktivterdiń biri
«Baisat» bazarynyń bir bóligi memleketke qaitarylǵan aktivterdiń qataryna kiredi. Qazirgi ýaqytta ony satý jumystary jalǵasyp jatyr. Eger kezekti saýda-sattyqtar da nátije bermese, nysannyń kommýnaldyq menshikke ótý yqtimaldyǵy joǵary. Aita keteiik, «Baisat» – Almatydaǵy eń iri kóterme jáne bólshek saýda oryndarynyń biri sanalady. Onyń bir bóligi memleketke aktivterdi qaitarý jumystary aiasynda ótken jyldary qaitarylǵan bolatyn.
