Birinshilik 3-4 qarasha kúnderi Kókterek kentinde ornalasqan «Altyn Bulak Golf & Health Resort» golf klýbynda uiymdastyrylýda. Týrnirge Resei, Túrkiia, Ózbekstan, Qyrǵyzstan, Tájikstan elderinen kelgen oiynshylar baq synady. Jarysqa 21 jastan asqan shet elden kelgen jáne elimizdiń er azamat golfistteri qatysty. Qazir týrnirge 48 qatysýshy jiberilip otyr.
Halyqaralyq jarystyń tusaýkeserinde sóilegen oblys ákimi Janseiit Túimebaev barlyq qatysýshylarǵa sáttilik tiledi.
«Búgin bastalǵan «SARYAGASH OPEN 2018» golf týrniri Saryaǵash kýrort demalys aimaǵyn týrizm oshaǵy retinde kórshi elderge de nasihattaityn shara bolmaq. Maqsaty - týǵan elge degen patriottyq sezimderdi jas urpaqqa nasihattaý, belsendi demalys jáne ekologiialyq týrizmdi damytý, oblysty týristik destinatsiia retinde qalyptastyrý. Endeshe sizderdi ótip jatqan «SARYAGASH OPEN 2018» golf týrniri is-sharasymen shyn júrekten quttyqtap, barshańyzǵa baq-bereke, myqty densaýlyq tileimin. Atalǵan shara aldaǵy ýaqytta da dástúrli túrde ótip turatynyna senimimiz mol» - dedi Janseiit Qanseiituly.
Áýesqoilyq týrnir Sent-Endriýs Koroldik Golf Klýbynyń erejelerine sáikes jáne «Altyn Bulak Golf & Health Resort» jergilikti erejelerine sáikes jeke Stroke play formatynda ótýde.
Týrnirde 1,2,3 oryndy ielengen qatysýshylar estelik syilyqtarmen marapattalatyn bolady. Oiyn nátijeleri teń túsken jaǵdaida, úzdik oiyn kórsetken qatysýshy jeńimpaz atanady. Ózge de nominatsiialar boiynsha úzdik oiynshylar uiymdastyrýshylar men demeýshiler tarapynan baǵaly syilyqtarǵa ie bolady.
