QR Memlekettik kúzet qyzmetiniń «SARDAR» komandasy 3-7 aqpan aralyǵynda BAÁ-niń Dýbai qalasynda ótken UAE SWAT Challenge 2024 halyqaralyq saiysynda qola júlde jeńip aldy, – dep habarlaidy Dalanews.kz.
Táýelsiz Qazaqstan tarihynda tuńǵysh ret elimizdiń arnaýly bólimshesiniń komandasy aitýly halyqaralyq saiysta jeńiske jetti.
Búkil álemnen jinalǵan 80-nen astam komandany basyp ozǵan «SARDAR» tek saiys qojaiyndaryna – Dýbai qalasy politsiiasynyń eki komandasyna ǵana jol berdi.
UAE SWAT Challenge – kúshtik qurylymdardyń arnaýly maqsattaǵy bólimsheleri arasyndaǵy chempionat bolyp tabylady. Biyl saiys besinshi ret ótkizildi, oǵan búkil álemnen kelgen komandalar qatysyp, kedergilerden ótý, shabýylmen basyp alý, kepilge alynǵandardy qutqarý, jaralylardy evakýatsiialaý, qarý túrlerinen atý sekildi kúrdeli synaqtardan ótti.
Saiystyń barlyq kezeńderinde «SARDAR» úzdik taktikalyq daǵdylar, kúsh-qýat, tózimdilik pen biik rýhyn tanytty. Úshinshi jáne tórtinshi kúndegi nátijeler boiynsha komanda saiystyń úzdik úshtiginen senimdi oryn aldy.
Chempionattyń besinshi, sheshýshi kezeńinde de «SARDAR» joǵary arnaýly jáne taktikalyq ázirligin jáne myqty komandalyq rýhyn kórsetti.
QR Memlekettik kúzet qyzmeti komandasynyń jarqyn jeńisi - elimizdiń arnaýly memlekettik organy jeke quramynyń kúsheitilgen úzdiksiz daiyndyǵynyń, memlekettiń órkendeýine jáne onyń qaýipsizdigin saqtaýǵa baǵyttalǵan patriottyq tárbiesiniń jemisi.
Saiystyń sońǵy «Kedergiler jolaǵy» kezeńinde oinatylǵan QR Memlekettik kúzet qyzmeti jeke quramynyń jańa ánurany - «Rýh» áýeni de komanda múshelerin jeńiske jetelegeni anyq!
«Sardar» komandasy óziniń halyqaralyq saiystaǵy jeńisin barlyq otandastaryna arnaidy!
