Memorandým aıasynda «Samuryq-Qazyna» ulttyq ál-aýqat qory 100 jedel járdem kóligin, 1000 ottegi konsentratyn, 50 ókpeni jasandy jeldetý apparatyn, 1000 púlsoksımetr jáne 3000 «Avıfavır» vırýsqa qarsy dárisin satyp alyp, QR Densaýlyq saqtaý mınıstrligine tapsyrýdy bastady. Kómektiń bul túrleri QR Densaýlyq saqtaý mınıstrligimen kelisile otyryp, kómektiń tapshylyǵy retinde tańdalyndy.
– Bul sharalardyń barlyǵyn el Prezıdenti Toqaev Qasym-Jomart Kemeluly qoldady. Ózderińiz biletindeı, jaqynda Elbasymen kezdesý ótip, onda ol Qordyń ishki qorynan Nur-Sultan jáne Almaty qalalarynda eki medısınalyq ortalyq salýǵa qarajat bólýdi tapsyrdy. Bul ortalyqtar halyqqa medısınalyq qyzmet kórsetý úshin ǵana emes, sonymen qatar ǵylymı-zertteý áleýetin shoǵyrlandyrýǵa arnalady. Atalǵan jumysty biz bastadyq, qarajatty rezervke saldyq, – dep atap ótti Ahmetjan Esimov.
Sóz sońynda qor basshysy QR Densaýlyq saqtaý mınıstrliginen medısına ortalyqtary boıynsha tehnıkalyq tapsyrma alýdy tezdetýdi, al atalǵan qalalardyń ákimderinen tıisti komýnıkasıalary bar jer ýchaskelerin bólýdi surady.
– QR Densaýlyq saqtaý mınıstrligi atynan Qordyń kórsetken korporatıvtik áleýmettik jaýapkershiligine jáne juqpaly aýrýlardyń, onyń ishinde koronavırýstyń órshýine qarsy kúreste ulttyq densaýlyq saqtaý júıesin nyǵaıtýǵa yqpal etkenine alǵys bildirýge ruqsat etińizder. Memorandým qazirgi epıdemıologıalyq qaýip-qaterlerge der kezinde jáne qajetti sharalar qabyldaýǵa múmkindik beretinine senimdimin, – dedi Alekseı Soı.
«Avıfavır» – klınıkalyq synaqtarda tıimdiligin rastaǵan álemdegi koronavırýsqa qarsy eki dáriniń biri. Koronavırýsty emdeýge arnalǵan dárini «Samuryq-Qazyna» qory «Reseı tikeleı ınvestısıalar qorynyń Basqarýshy kompanıasy» AQ-nan satyp aldy.
Ahmetjan Esimov dárini jasaýshy «Reseı tikeleı ınvestısıalar qorynyń Basqarýshy kompanıasy» AQ-men onlaın-konferensıa barysynda onyń basshysy Kırıl Dmıtrıevke osy preparattardy satyp alý múmkindigi úshin alǵys aıtty.
Esterińizge sala keteıik, «Samuryq-Qazyna» qory tótenshe jaǵdaıdyń alǵashqy kúninen bastap koronavırýspen kúreske belsendi qatysýda. Elbasynyń tapsyrmasyn oryndaý úshin qor Nur-sultan jáne Almaty qalalarynda ınfeksıalyq aýrýlardyń aldyn alý jáne baqylaý boıynsha eki klınıka qurylysyn qarjylandyratyn bolady. Aǵymdaǵy jyldyń Naýryz aıynda qor 6 mln qorǵaý maskalaryn satyp alýdy qarjylandyrdy, sondaı-aq ekonomıkanyń ósýin nyǵaıtý, otandyq taýar óndirýshilerdi qoldaý jáne densaýlyq saqtaý salasyn damytý boıynsha sharalar qabyldady.
