QR Qarjy ministrligi «Salyq salý obektilerin jáne (nemese) salyq salýǵa bailanysty obektilerdi janama ádispen aiqyndaý qaǵidalaryn bekitý týraly» buiryq jobasyn ázirledi. Qujat jańa Salyq kodeksiniń (173-baptyń 5-tarmaǵy) erejelerin iske asyrý maqsatynda ázirlendi jáne salyq júiesiniń ashyqtyǵy men ádildigin arttyrýǵa baǵyttalǵan, dep habarlaidy Dalanews.kz.
Joba salyq salý obektilerin aiqyndaýdyń janama ádisin qoldaný tetigin kózdeidi. Ol salyq tóleýshi esep júrgizý tártibin buzǵan jaǵdailarda, sondai-aq esep qujattamasy joǵalǵan nemese joiylǵan kezde memlekettik kirister organdarymen qoldanylatyn bolady. Budan bólek, bul ádis jeke tulǵalardyń kirisin neǵurlym obektivti aiqyndaýǵa múmkindik beredi.
Janama ádistiń máni – bastapqy qujattar bolmaǵan nemese burmalanǵan jaǵdaida salyq organdary balamaly aqparat kózderin paidalanatynynda. Salyq salý bazasyn esepteý úshin salyq tóleýshiniń aktivteri men múlki, mindettemeleri, ainalymdary, kiristeri, shyǵyndary men jumsaýlary jónindegi derekter qoldanylýy múmkin. Mundai ádis aýytqýshylyqty anyqtap, sýbektiniń naqty qarjylyq jaǵdaiy týraly shynaiyraq kórinis alýǵa múmkindik beredi.
Janama ádisti qoldaný birqatar mindetterdi sheshedi:
• salyqtyq ákimshilendirýdiń tiimdiligin arttyrady;
• deklaratsiialarda málimetterdiń tolyqtyǵy men shynaiylyǵyn qamtamasyz etedi;
• salyqtyq táýekelderdi qashyqtan monitoringileýge múmkindik beredi;
• salyq tóleýden jaltarýdyń aldyn alýǵa yqpal etedi;
• salyq salýdyń ádildik qaǵidatyn nyǵaitady.
Bul kóleńkeli ekonomikanyń kólemin azaitýǵa jáne biznesti júrgizýdiń neǵurlym adal jaǵdailaryn qalyptastyrýǵa alyp keledi.
