Otyrys basynda Úkimet basshysy Prezidenttiń senimi úshin óz alǵysyn bildirip, Ministrler kabinetiniń jańa quramyn tanystyryp shyqty.
– Elbasy Nursultan Nazarbaev Úkimettiń quramyn bekitti. Kóp otyrǵandai, kóp kadrlyq ózgerister bolǵan joq. Muny Elbasynyń bizdiń bárimizge kórsetken úlken senimi dep qabyldaýymyz qajet. Sondyqtan Úkimet músheleriniń atynan jáne jeke ózimniń atymnan Elbasyna kórsetip otyrǵan qoldaýy men senimi úshin alǵys aitqym keledi, – dedi B.Saǵyntaev.
Osydan keiin Premer-ministr Prezidenttiń Aqordadaǵy Úkimettiń keńeitilgen otyrysynda bergen tapsyrmalaryn taǵy bir márte táptishtep shyqty.
– Osy tapsyrmalar úshin suranys qatań bolady. Onyń barlyǵy belgilengen merzimde jáne sapaly oryndalýy tiis. Sondyqtan bárimizdi qaýyrt jumys kútip tur. Elbasymen birge baratyn saparlar bolmasa, búkil sheteldik is-saparlardy jyldyń sońyna deiin qoia turý qajet. Asa bir qajettilik týyndai qalsa, onda meniń jeke ókimim boiynsha shyǵasyzdar. Elimizdiń óńirlerine jasaityn saparlarǵa da kelisip shyǵasyzdar. Sizder Úkimet tarapynan qandai sheshimder kerek, tez arada anyqtap, usynys engizińizder. Biz qabyldaǵan sheshimder qarapaiym xalyqqa túsinikti bolýy tiis. Bizdiń kez kelgen sheshimderimiz jurtshylyqqa tez arada jetip, maqsat-mindetterdi únemi túsindirip otyrý qajet, – dep atap kórsetti B.Saǵyntaev.
Búgingi otyrys barysynda Úkimet músheleri Ulttyq qordan qosymsha 379,9 mlrd. kólemindegi qarjyny bólýdi kózdeitin zań jobasyn biraýyzdan qabyldady. Atalǵan aqshany jumyspen qamtý jáne ekonomikalyq ósimdi qamtamasyz etýge arnalǵan jobalarǵa jumsaý josparlanyp otyr.
