Almatyda dástúrli sadaq atýdan ulttyq quramanyń kóshpeli oqý-jattyǵý jiyny ótip jatyr. Ulttyq qurama qyrkúiekte Astanada ótetin V Dúniejúzilik kóshpendiler oiyndaryna qatysady.
Oqý-jattyǵý jiynyna 12 sportshy qatysady: irikteýden ótken 10 sportshy jáne taǵy 2 sportshy rezervte bolady. Onyń ishinde 6 er adam, 4 qyz kóshpendiler oiyndarynyń erejelerine sáikes jarystarǵa qatyspaq.
«Jattyǵýlar óte qarqyndy júrip jatyr, V Dúniejúzilik kóshpendiler oiyndaryna az qaldy. Sondyqtan biz qazir jattyǵýdy kúsheitip, jańa ádisterdi úirenip jatyrmyz.
Sportshylarymyz halyqaralyq deńgeide jaqsy nátije kórsetip keledi. Búginde sporttyń osy túri boiynsha Kóshpendiler oiyndaryna qatysýǵa 35 el tirkelgen, bul degen 300-ge jýyq sportshy. Barlyǵy bizdiń sportshylarmen bir arenaǵa shyǵyp, birinshi orynǵa talasady.
Osyndai daiyndyq arqyly biz jaqsy nátijelerge qol jetkize alamyz jáne sportshylarymyz tuǵyrda kók týymyzdy mindetti túrde kóteredi», - dedi dástúrli sadaq atýdan Qazaqstan ulttyq quramasynyń aǵa jattyqtyrýshysy Dias Ahmetov.
Daiyndyq barysy týraly dástúrli sadaq atýdan ulttyq qurama múshesi Erbol Tapenov aityp berdi.
«Men 5 jyldan astam ýaqyttan beri dástúrli sadaq atýmen ainalysyp kelemin. Bul erekshe sport, óitkeni ol zeiindi, shydamdylyqty, tózimdilikti qajet etedi. Qazir V Dúniejúzilik kóshpendiler oiyndaryna daiyndyqtan ótip jatyrmyz, irikteýden óttik, oiynǵa qatysýshylar quramyna kirdik. Ózimizdi joǵary deńgeide kórsetemiz dep oilaimyn», - dedi sportshy.
Esterińizge sala keteiik, respýblikalyq sadaq atý federatsiiasy Ulttyq sport túrleri qaýymdastyǵynyń quramyna kiredi. Sonymen qatar qaýymdastyq quramyna báige, kókpar, aýdaryspaq, asyq atý, jamby atý, teńge ilý, qusbegilik, JORYQ federatsiialary da kiredi. Al qaýymdastyqty belgili kásipker, metsenat, Altyn Qyran Foundation qoǵamdyq qory qamqorshylyq keńesiniń tóraǵasy Islambek Saljanov basqarady.
