Tergeý aiaqtalǵan soń jylý ortalyǵy memleket menshigine nemese investorǵa kóshedi. Bul týraly aimaq ákimi Daniial Ahmetov málimdedi, dep habarlady Informbiýro saity.
"6 qarashadaǵy apattan beri Ridderdegi JEO menshik iesi jaǵdaidy durys úshin eshqandai áreket jasamady", - dep málimdedi oblys ákimi. Onyń aitýynsha, jylý ortalyǵy tórt jyldan beri jóndelmegen.
Keiingi eki aida Ridderdegi jylý ortalyǵynda birneshe márte apat boldy.
19 qańtarda tańerteńgi saǵat 7-de Ridderdegi jylý elektr ortalyǵynyń ot jaǵý tsehynan órt shyqty. Bul jóninde jylý elektr ortalyǵy mekemesiniń basshylary habarlady. Órtke ne sebep bolǵany aitylmaidy. Turǵyndar úiler "birden sýyp ketkenin" aitty.
– Buǵan deiin de ońyp turmaǵan edi. Qazir tipti sýydy. Birden sýydy. Sýymaǵanda qaitedi, jylý elektr ortalyǵy istemei qaldy, – dedi Nazar Asainov. Áleýmettik jelide ózge turǵyndar da jylý joǵyna shaǵymdandy.
Jylý elektr ortalyǵynyń direktory saǵat 9-da “órt sóndirilgenin” habarlady.
“Qazirgi ýaqytta órt tolyq sóndirildi, qaza tapqandar joq. Ot jaǵý qalpyna keltirilip jatyr. Jylý jelisiniń temperatýrasy ýaqytsha tómendeidi. Sabyr saqtaýlaryńyzdy suraimyz" dedi ortalyq basshysy Ál-Taiyr Aqbojanov.
"Vlast" saitynyń jazýynsha, oqiǵa ornyna oblys ákimi Danial Ahmetov barǵan. Ol jylý ortalyǵyndaǵy otyn ýaqytsha mazýtpen almastyrylatynyn aitqan.
"Ridder JEO-da otyn túri kómirden mazýtqa aýystyrylyp jatyr. «Qazmyrysh» kásiporyny 960 tonna mazýt jiberedi, ol bir táýlik ishinde kelip jetedi. Al JEO-nyń ózinde 320 tonna mazýt bar. Sonda bes táýlikke jetkilikti qor bolady. Jospar boiynsha, aldaǵy úsh kúnde mazýtpen jylytamyz. Osy aralyqta qazandyqty qalpyna keltirip, qaitadan qatty otynǵa kóshiremiz" dedi Danial Ahmetov.
Jyl basynan beri Ridderdegi jylý elektr ortalyǵynda osymen ekinshi ret "tótenshe jaǵdai" bolyp otyr. 5 qańtarda Ridder jylý ortalyǵynyń kúl shyǵarý júiesindegi stantsiiasynda sorǵy isten shyǵyp, "sý astynda qalǵan". Sol kezde de turǵyndar úileri "sýyq ekenine" shaǵymdanǵan.
Byltyr jyl aiaǵynda jylý elektr ortalyǵynda birneshe ret apat bolyp, ortalyqtandyrylǵan júiege qosylǵan 22 myńnan astam otbasy salqyn úilerde túneýge májbúr bolǵan edi. Sol kezde qalada tehnogen sipattaǵy tótenshe jaǵdai rejimi engizilgen. Bul tótenshe jaǵdai rejimi áli kúshinde. Sol kezde ShQO ákimi JEO-daǵy máselege ortalyq basshylyǵy men energetika ministrliginiń jergilikti ókilderin aiyptaǵan. Oblys prokýratýrasy qarashada JEO-da tótenshe jaǵdai sebebin anyqtaý boiynsha tekserý júrgizilip jatqanyn málimdegen, biraq nátijesin áli jariialaǵan joq.
