Qazaqstan Respýblıkasy Premer-mınıstriniń birinshi orynbasary Roman Sklár Yutong transulttyq kompanıasynyń basqarma tóraǵasy Van Ventaomen kezdesti, - dep habarlaıdy Dalanews.kz.

Kelissózder barysynda Qaraǵandy oblysy Saran qalasynyń ındýstrıalyq aımaǵynda ornalasqan QazTehna zaýytynyń bazasynda avtobýs tehnıkasyn óndirý jónindegi birlesken jobany iske asyrýdyń aǵymdaǵy nátıjeleri talqylandy.

Van Ventao myrza álemdegi eń iri avtobýs tehnıkasyn óndirýshi Yutong-pen seriktestikte iske asyrylyp jatqan jobany jan-jaqty qoldaǵany úshin Qazaqstan Úkimetine alǵys bildirdi.

«Biz Qazaqstan Respýblıkasy Úkimetiniń mashına jasaýdy damytý jáne ekonomıkany ártaraptandyrý salasyndaǵy kúsh-jigerin joǵary baǵalaımyz jáne osy prosesterge belsendi qatysýǵa daıynbyz», — dep atap ótti ol.

Basqarma tóraǵasy sondaı-aq kompanıa Qazaqstandy Ortalyq Azıadaǵy negizgi strategıalyq naryq retinde qarastyratynyn atap ótti. Osyǵan baılanysty Yutong ınvestısıalar kólemin ulǵaıtý, tehnologıalar transfertin keńeıtý jáne óndiristi lokalızasıalaýdy tereńdetý jolymen qazaqstandyq tarappen yntymaqtastyqty odan ári ulǵaıtýǵa nıetti.

Búgingi tańda QazTehna zaýytynyń óndiristik portfelinde Yutong markaly qalalyq, qalaaralyq, týrısik jáne mamandandyrylǵan avtobýstardy qamtıtyn ónimderdiń keń spektri bar. Kásiporynda joǵary bilikti mamandar úshin 1 myńnan astam jumys orny quryldy. 2021 jyly zaýyt iske qosylǵan sátten bastap 4 myńnan astam avtobýs tehnıkasy óndirildi.

2025 jyly 1,5 myńnan astam avtobýs shyǵarý josparlanǵan, bul iske asyrylyp jatqan jobanyń ósýi men turaqtylyǵyn kórsetedi. 

Qazirgi ýaqytta kásiporynnyń tehnologıalyq bazasyn keńeıtýge jáne jergilikti qamtý úlesin arttyrýǵa baǵyttalǵan jańa óndiristik qýattardyń qurylysy júrgizilip jatyr. 10 myń sharshy metrden astam aýmaqta qaptama elementterin dánekerleý, qurastyrý, daıyndaý jáne shtamptaý boıynsha zamanaýı korpýstar ornalastyrylady, bul lokalızasıalaý deńgeıin edáýir arttyrýǵa jáne Qazaqstanda avtobýs tehnıkasynyń jetekshi óndirýshisi retinde QazTehna pozısıasyn nyǵaıtýǵa múmkindik beredi.

Taraptar ózara tıimdi áriptestikti odan ári keńeıtýge jáne eldiń ónerkásiptik áleýetin nyǵaıtýǵa nıetti ekenderin bildirdi.