Resei Dýmasynyń depýtaty Mihail Matveev rýbldiń qunsyzdanýyn eńbek migranttarynyń shetelge jasaǵan qarjylyq aýdarymdarymen bailanystyrdy dep jazady Dalanews.kz.
Matveevtiń sózinshe, Reseide jumys isteitin milliondaǵan migranttar el ekonomikasynan aitarlyqtai kólemdegi qarajatty syrtqa áketip, bul aqshany kóbinese dollar nemese basqa shetel valiýtalaryna aiyrbastaidy.
Bul úrdis, onyń pikirinshe, rýblge degen senimdi álsiretip, shetel valiýtasyna suranysty kúsheitýde.
2023 jyly migranttar Tájikstanǵa $5,7 mlrd, Ózbekstanǵa $14,5 mlrd, Qyrǵyzstanǵa eldiń JIÓ-niń úshten birine teń kólemde aqsha aýdarǵan. Grýziia ($2 mlrd), Armeniia ($3 mlrd) men Qazaqstanda da milliardtaǵan dollar qarjy alǵan elderdiń qatarynda.
Matveev Reseige qarsy sanktsiialarǵa qosylǵan aimaqtaǵy keibir elderge de shúilikken eken.
Onyń aitýynsha, bul elder Reseidiń «Mir» tólem júiesimen operatsiialar jasaýdan bas tartqan, sondyqtan migranttar aqshalaryn dollarmen shyǵaryp, úilerine jóneltýge májbúr. Bul jaǵdai shetel valiýtasyna suranysty arttyryp, rýbldiń qunsyzdanýyna yqpal etken.
Onyń aitýynsha, bul elder óz ekonomikasyn reseilik qarajatpen qamtamasyz etip qana qoimai, Máskeýge qarsy qarjylyq saiasatty qoldap otyr. Mundai áreketter Reseidiń geosaiasi múddelerine tikelei qaishy keledi.
Matveevtiń pikiri Resei ekonomikasy shatqaiaqtap turǵan kezde aitylyp otyr. Sońǵy aptada rýbl dollarǵa shaqqanda kúrt qunsyzdanǵany baiqaldy.
Sarapshylar rýbldiń qunsyzdanýyn basqa da faktorlarmen bailanystyrady, sonyń ishinde Reseige qarsy sanktsiialardyń áseri, munai baǵasynyń qubylmalylyǵy jáne ishki qarjy naryǵyndaǵy turaqsyzdyq.
Sonymen qatar, Reseidegi ekonomikalyq jaǵdaidyń nasharlaýy, migratsiialyq saiasattyń qataiǵany jáne migranttardyń áleýmettik jaǵdaiyna degen kózqarastyń ózgerýi keri migratsiia úrdisin kúsheitýde. Keibir derekter boiynsha, Reseide tabys tabýǵa kelgen migranttardyń bir bóligi óz otandaryna oralýda.
