Búgin Resei Federatsiiasynyń Amýr oblysynda bortynda 43 jolaýshy bolǵan An-24 jolaýshylar ushaǵy radardan joǵalyp ketti. Kóp uzamai onyń apatqa ushyraǵany belgili boldy, dep habarlaidy Dalanews.kz.
"Angara" áýe kompaniiasyna tiesili, Habarovsk – Blagoveshensk – Tynda baǵytyna qatynaityn jolaýshylar ushaǵymen Amýr oblysyna kelgende, iaǵni Tynda qalasynyń áýejaiyna birneshe shaqyrym qalǵanda bailanys úzilgen.
"Aldyn ala málimetter boiynsha, ushaq bortynda 43 jolaýshy (onyń ishinde bes bala) jáne alty ekipaj múshesi bolǵan. Ushaqty izdeýge barlyq qajetti kúshter men quraldar jumyldyrylǵan. An-24 aýada qandai da bir qaýip týraly belgi bermegen", dep jazady TASS.
Ushaq Tynda áýejaiyna qoný úshin ekinshi ret ainalyp kelýge ketkende radardan joǵalǵan. Izdeý jumystary barysynda An-24-tiń janyp jatqan qaldyqtary atalǵan qaladan 16 shaqyrym qashyqtyqta taýdyń baýraiynan tabyldy. Aldyn ala málimetter boiynsha, borttaǵy barlyq adam qaza tapqan.
"Aldyn ala boljam boiynsha, aýa-raiynyń qolaisyzdyǵyna bailanysty qonýǵa jaqyndaǵanda taý basyndaǵy úshkir tasty ilip ketken ekipajdyń qateligi týraly aitylady. Basqa nusqalar da qarastyrylyp, tekserilýde", - deidi TASS derekkózi.
