Resei qaýipsizdik kúshteri Qazaqstan men Orta Aziiadan kelgen jolaýshylar men júrgizýshilerdi adyraspan shóbin tasymaldaǵany úshin ustai bastady, dep habarlaidy Dalanews.kz.
"17 sáýirde Petýhovskii aýdanynda Resei Federatsiiasynyń Qorǵan jáne Túmen oblystary boiynsha federaldyq qaýipsizdik qyzmetiniń qyzmetkerleri avtobaqylaý beketinde Aziia respýblikasynan kirmek bolǵan avtokólikti tekserý barysynda shamamen 120 gramm bolatyn adyraspandy tapty. Olar quramynda esirtkisi bar zatty tasymaldamaq bolǵan 51 jastaǵy áieldi anyqtady. Al 24 sáýirde kórshi memlekettiń 37 jastaǵy azamaty basqarǵan DAF júk kóligin tekserý kezinde 50 gramm adyraspan ósimdigi tabylǵan", - delingen RF Ishki ister ministrliginiń Qorǵan oblysy boiynsha departamenti taratqan habarlamada.
Osy tusta Resei IIM "Petýhovskii" mýnitsipalitetaralyq basqarmasynyń tergeýshisi RF Qylmystyq kodeksiniń 229.1-babynyń 3-bóliginde "Esirtki, psihotroptyq zattardyń kontrabandasy" tarmaǵynda kózdelgen qylmys belgileri boiynsha qylmystyq is qozǵaǵan.
"Tyiym salynǵan shópti tasymaldaǵany úshin 12 jylǵa deiingi merzimge bas bostandyǵynan aiyrý jazasy qarastyrylady. Bul azamattar Resei Federatsiiasynyń Qylmystyq-protsestik kodeksiniń 91-babyna sáikes ustaldy", - dep túsindirdi reseilik politsiia.
QR IIM baspasóz qyzmeti QazTAG redaktsiiasyna Qazaqstanda “adyraspan” degen atpen belgili ósimdiktiń zańsyz ainalymyna Reseide aqpan aiynan bastap tyiym salynǵanyn rastady.
Osyǵan orai Qazaqstannyń tártip saqshylary halyqqa úndeý joldady. Aitýlarynsha, Reseige adyraspan jetkizgen azamattar 1 million rýblge deiin aiyppulmen 3 jyldan 7 jylǵa deiin bas bostandyǵynan aiyrylady.
"Joǵary mólsherdegi ósimdikterdi tasymaldaǵany úshin (30 gramnan joǵary) Resei zańnamasy bir million rýblge deiingi aiyppulmen 10 jyldan 20 jylǵa deiingi merzimge bas bostandyǵynan aiyrý jazasyn qarastyrady. Ósimdikti asa iri mólsherde (3000 gramnan) ákelgeni úshin jaza bir million rýblge deiin mindetti aiyppulmen 15 jyldan 20 jylǵa deiingi merzimge bas bostandyǵynan aiyrýdy qamtidy",- dedi Qazaqstan Ishki ister ministrligi.
Sonymen qatar IIM shetelge shyǵýdy josparlap otyrǵan Qazaqstan azamattaryna baratyn eldiń zańnamasyn saqtaýǵa shaqyrdy.
“Shet elderde tyiym salynǵan zattar tizimine enýi múmkin ósimdikterdi nemese dárilik zattardy tasymaldaý kezinde erekshe saq bolý kerek”,- dep eskertti IIM.
Aita keteiik, adyraspan – Shyǵys Eýropa men Orta Aziianyń jartylai qurǵaq dalalarynda ósetin, emdik qasieti bar kópjyldyq shóptesin ósimdik. Qazaqstanda, Ortalyq Aziia elderinde, sondai-aq Iran men Ázirbaijanda adraspandy hosh iisti zat retinde paidalanady.
