Resei Ózbekstannyń Jyzaq oblysynda atom elektr stantsiiasyn salady. Degenmen keibir sarapshylar bul joba kúmándi ekenin aitady. Solardyń biri - ózbek ekonomisi Behzod Hoshimov. Ol "Rosatomnyń" Ózbekstanǵa kelýiniń ekonomikalyq jáne saiasi astary baryn aitty, - dep habarlaidy Dalanews.kz.
Resei prezidenti Vladimir Pýtinniń Tashkentke sapary aiasynda tiisti kelisimge qol qoiylǵan. Osylaisha jazda Jyzaq oblysynda qýaty 330 MVt bolatyn nysannyń qurylysy bastalmaq. Qurylys jumystary "Rosatom"-nyń jetekshiligimen júzege asady.
Sarapshy "atom elektr stantsiiasyn salý týraly sheshim ekonomikalyq turǵydan oryndy boldy ma, onyń qurylysyna Ózbekstan qansha qarjy jumsaidy?" degen saýaldardy qoidy.
"Ol (AES - esk.) basqa qarjy kózderinen, sonyń ishinde memlekettik qaryzdan qarjylandyryla ma? Eń bastysy, memleket salyp jatsa, budan Ózbekstan halqyna qansha shyǵyn keledi? Memlekettik jáne memlekettik emes qarjy kózinen paidalanylatyn somalar tolyq kórsetilýge tiis. Bul talap bizdiń Konstitýtsiiamyzda da aiqyndalǵan. ...Biraq kelisimde stantsiianyń baǵasynan da mańyzdyraq basqa da sharttar bar. Ol týraly da aitýymyz kerek. Stantsiiany kim basqaratyny, elektr energiiasy qandai baǵamen satylatyny óte mańyzdy. Túrkiiada Resei (AES-ti) tolyǵymen óz qarajatyna salyp, 1 kilovatt saǵat energiiaǵa 12,5 tsent degen mámile jasady. Dál osyndai jaǵdaida qabyldaý kerek pe degen oryndy suraq týyndaidy. Búginde Ózbekstanda arzanyraq generatsiia kózderi bolsa, qymbat atom energiiasy qanshalyq qajet?" - dedi ol.
Hoshimov máseleniń saiasi aspektileri baryn málimdedi.
"Memlekettiń shyǵynyna, ásirese, iri jáne mańyzdylaryna qatysty ekinshi másele - merdigerdi tańdaý. Tenderge "Rosatomnan" basqa kompaniialar qatysty ma? Frantsiia men Japoniia siiaqty elderde atom energetikasy áldeqaida damyǵan, sonymen qatar, olar joǵary sapaly stantsiialar salyp jatyr. Olardyń kompaniialary bizdiń Úkimetke ne usyndy? Nelikten "Rosatom"? Bul suraqty qoiyp otyrǵan sebebim, mundai máselede saiasatqa oryn joq. Eýropa reseilik energetikadan tolyǵymen bas tartty, buǵan Eýropadaǵy soǵys sebep boldy. Bir kezderi Germaniia saiasi aspektini eskermei, tek ekonomikalyq esepke súienip, reseilik energiia arzan dep sheshti jáne bul sheshimnen kóp shyǵynǵa ushyrady. Biraq biz siiaqty áldeqaida shaǵyn memleketke AES-tiń negizgi merdigeri Resei memleketi jáne Resei memlekettik kásiporny ekeni óte úlken másele bolýy kerek", - dedi ol.
Ol "japondar men orystar birdei baǵa usynsa, japondardy tańdaý kerek der edim. Qalai bolǵanda da, saiasi qaýip áldeqaida tómen. Soǵys áli bitken joq, eger jańa sanktsiialar salynsa, máselen bizdiń elimizdegi elektr stantsiiasy men onyń tutynýshylaryna salynsa, ózbekterge keler saldary ashyq másele bolady. Ózbekstan energetika salasyn jańǵyrtýǵa alatyn qarjy negizinen Batys nemese Batys jetekshilik etetin qarjy institýttarynan keledi. Bul uiymdardyń barlyǵy Reseige qarsy sanktsiia salǵan. Endi bir ǵana AES-tiń kesirinen búkil energetikalyq júieni jańǵyrtatyn tehnologiia men qarjy kózi joiylyp ketetin qaýip bar ma?" - dedi.
