Roskosmos kelesi jyldan bastap Baiqońyr ǵarysh ailaǵyn konservatsiialaý týraly jabyq konsýltatsiialar ótkize bastady, - dep habarlaidy Dalanews.kz.
Bul týraly DALA INSIDE derekkózi habarlady. Roskosmos mekemeleri, ásirese mańyzdy bolyp sanalatyn jer serikterin jasaityn «Hrýnichev ortalyǵy» men zymyran qurastyratyn RKTs «Progress» sanktsiiaǵa ushyraǵaly beri, Reseidiń ǵarysh vedomstvosy aýyr qarjylyq jaǵdaiǵa dýshar boldy. Barlyq halyqaralyq tapsyrystar toqtaǵandyqtan, al Resei áskerileri spýtnikterin Plesetsk ǵarysh ailaǵynan ushyryp júrgendikten, Baiqońyrdan Roskosmosqa shyǵynnan basqa eshteńe túspei otyr.
Resei onsyz da Baiqońyrda barynsha qysqaryp, 234 nysandy Qazaqstanǵa qaitaryp bergen bolatyn. Ózine tek ǵaryshqa zymyran ushyratyn infraqurylymdy saqtap qalǵan. Biraq onyń ózin ustap turýǵa qajet shyǵyndardy jaba almaityny baiqalady. Resei Federatsiiasy 2050 jylǵa deiin sozylǵan kelisim boiynsha Baiqońyrdy jalǵa alǵany úshin Qazaqstanǵa jylyna 115 million dollardan tólep otyrýy tiis. Biyl Reseidegi biýdjet defitsiti 2 trillion rýblden asatyny boljanyp otyr. Ol ishki jalpy ónimniń 1,1 paiyzy bolady.
Roskosmostyń jaǵdaiy óte múshkil. Oǵan ne memleket kómektesýi kerek, nemese naryqtan qaryz alýy tiis. Biyldan bastap Roskosmos obligatsiia shyǵarý quqyǵyna ie boldy. Ol Resei Qarjy ministrliginiń «mekeme naryqtan ózi qaryz alsyn, bizdiń oǵan tikelei sýbsidiia beretin jaǵdaiymyz joq» isharasyn bildiredi.
«Biýdjetti qysqartqanda, Roskosmostyń eń birinshi oilanatyny Baiqońyr», - deidi derekkóz. «Al Roskosmos qazirgi soǵys jaǵdaiynda áskeri baǵdarlamalardan basqa barlyq biýdjetti qysqartýǵa májbúr. Sondyqtan kelesi jyldy Baiqońyrdaǵy zymyran ailaqtarynyń tehnikalyq qamtylýy ekitalai. Resei Baiqońyrdy tek strategiialyq jaǵynan ǵana saqtap qalýǵa tyryspasa, bylaiynsha, qazir esh praktikalyq qajeti joq».
Resei ketip qalǵan jaǵdaida, Qazaqstan óz betinshe Baiqońyrdy tek mýzeige ainaldyra alady. Sebebi qazir biz jyl saiyn ǵaryshqa bólip otyrǵan 1 milliard teńge eshteńege jetpeidi. «Vostochnyi» áýejaiyn saqtap qalyp, damytyp, Baiqońyrdy sheteldik týrister keletin kýltti orynǵa ainaldyrý ideiasy jaman emes. Nemese Baiqońyrdy kádimgi ǵarysh starty retinde saqtap, damytý úshin Qytai, álde Ilon Maskqa júginý ǵana qalyp otyr.
DALA INSIDE Roskosmostyń 2024 jylǵy qarjylyq ahýalyn monitoringte ustap otyrady.
