Shaharda el qundylyǵyn dáriptep, mereiin asqaqtatý maqsatynda avto sherý de uiymdastyryldy. QR Memlekettik Tý ustaǵan sherýshiler úsh topqa bólindi.
Alǵashqysy, 30 avtokólik sherýshi Tóle bi kóshesinen Ordabasy alańyna jinaldy. Al Shymqalanyń 30 velosportshysy Qazybek bi kóshesinen júrip ótse, elimizdiń kók bairaǵyn kótergen 30 erikti Áiteke bi kóshesinen Orbasy alańyna jinaldy.
Osylaisha shahardyń basty kóshelerimen júrip ótken sherý Memlekettik Týymyzdy kókke qalyqtatty. Janǵa qýat, boiǵa maqtanysh, asqaq rýh syilady.
Al 30 sany biylǵy rámizder kúnin atap ótý úshin beker tańdap alynǵan joq. Óitkeni, osydan 30 jyl buryn Qazaqstanda Ulttyq rámizder – Memlekettik Tý, Ánuran jáne Eltańba bekitildi. Memlekettik rámizderdiń ornalasýyna qatysty birneshe naqty shart bar ekenin aita ketý kerek.
Máselen, memlekettik mekemelerdiń kireberisinde ornalasatyn memlekettik týǵa túngi ýaqytta da jaryq túsip turýy shart.
Sondai-aq sýrette tý únemi oń jaqqa qarai jelbirep turýy tiis. Mekeme basshylarynyń jumys bólmesinde ornalasatyn memlekettik tý men memlekettik eltańbanyń ornalasý reti arnaiy talaptarǵa sáikes bolýy kerek.
Al 2020 jyldan beri memlekettik rámizder keńinen qoldanylady. Sebebi 2020 jyldyń qazan aiynda el prezidenti Qasym-Jomart Toqaev memlekettik rámizderdi paidalaný týraly zańnamany qaita qaraý qajettigin málimdegen bolatyn.
Osydan keiin týdy balkonǵa ilýge resmi ruqsat berildi. Biraq tek patriottyq sezim men qazaqy bolmysty tanytý úshin, Qazaqstan men el azamattarynyń jetistikterin qoldaý maqsatynda ilýge múmkindik berildi. Bul kúni Shymkenttegi Nursat shaǵyn aýdanynyń turǵyndary jappai balkonǵa memlekettik Týdy ilip, rámizder kúnin atap ótti.
Qala ákiminiń birinshi orynbasary Shyńǵys Muqan bul is-shara jyl saiyn iske asatynyn tilge tiek etti.
“Memlekettik rámizder kúni qarsańynda qala turǵyndary elimizdiń kók Týyna qurmet kórsetýdi ádetke ainaldyrǵan. Olar ózderiniń balkondaryna týdy ilýdi qolǵa alǵan. Bul jalpyhalyqtyq mereke. Memlekettik tý, jalpy rámizder árbirimizdiń júregimizde.
Sonymen qatar memlekettik rámizder kúnine arnalǵan is-shara búgingi kúnmen bastalmady jáne munymen shektelmeidi. Jyl basynan beri memlekettik rámizder kúnine arnalǵan túrli is-shara ótip kele jatyr.
Aýqymdy bolmasa da, mektep, balabaqsha men túrli ujymda rámizderge qurmet kórsetilip keledi. Bul sharalar jalǵasa bermek. Biz rámizderimizdi kúndelikti nasihattaýymyz kerek dep esepteimin”,- dedi qala ákiminiń birinshi orynbasary Shyńǵys Muqan.
Jastardyń boiynda patriottyq sezimdi arttyrǵan sharaǵa shahar basshysy Murat Áitenovten bastap, depýtattar, qalanyń ozat oqýshylary, qoǵam qairatkerleri men stýdentter qatysty.
Al sherýden soń, Táýelsizdik saiabaǵynda Qazaqstan Respýblikasynyń ánurany oryndaldy. Sondai-aq bul kúni elimizdiń gimni árbir mekemede jappai shyrqalyp, áleýmettik jelide estafetada bastalyp ketken.
Memlekettik rámizder – Tý, Eltańba jáne Ánuran Qazaqstan Respýblikasynyń derbestigi men táýelsizdigin búkil álemge tanytýshy ári memleketimizdiń ótkeni men búgini jáne bolashaǵy arasyndaǵy sabaqtastyqtyń jarqyn kórinisi.
Sondai-aq rámizder – halqymyzdyń muqalmas rýhyn, qaharmandyǵy men danalyǵyn, asqaq arman-tilegin jetkizetin qundy belgiler. Táýelsizdik saiabaǵyna jinalǵan jastar elimizdiń kók týy salynǵan kiimderdi arnaiy kiip kelgen.
Basty maqsat - turǵyndardyń patriottyq sezimin oiatý,- deidi olar.
“4 maýsym halyq úshin erekshe mereke. Sebebi bul kúni Egemendigimizdi dáleldeitin rámizder kúni toilanady. Sondyqtan Shymkent qalasynyń jastary Ordabasy alańyna jinalyp, sherýge qatystyq. Rámizderimiz ol árbir Qazaqstan Respýblikasynyń azamaty úshin úlken qundylyq. Ol elimizdiń mártebesi. Sol sebeptide kók týymyz tórde ilinip turady.
Biz ony aiaq astyna taptaýǵa jol bermeimiz. Al halyqaralyq olimpiadada jeńis tuǵyrynan kóringen sportshylar ánurandy álemge shyrqatyp, maqtan tutady. Barsha otandastyrymyzdy búgingi merekemen shyn júrekten quttyqtaǵym keledi”,- dep oiymen bólisti belsendi jastardyń biri
Aida Abbas.
“Meniń rámizderimizge degen qurmetim óte joǵary. Osyndai patriottyq aýqymdy sharany men qoldaimyn. Sondyqtan qolyma kók bairaǵymyzdy alyp Táýelsizdik saiabaǵyna kelip otyrmyn.
Al Týymyzdy alyp qalanyń úlken kóshelerimen sherýdiń júrip ótkeni halyqtyń rýhyn kóterdi dep oilaimyn. Búgingi mereke qutty bolsyn, halqymyzǵa tynyshtyq bersin”,- dep aq tilegin jaýdyrdy
qala turǵyny Tóregeldi Dúisenbek.
Kók týymyz tuǵyrly, Eltańbamyz eńseli, Ánuranymyz aibyndy el retinde búgingi merekeniń orny erekshe deidi shahar turǵyndary. Rámizder - qazaqstandyq patriotizmniń, Otanǵa degen mahabbattyń, onyń tarihyna, mádenieti men dástúrlerine degen tereń qurmettiń negizgi belgisi. Sondyqtan shymkenttikter bul merekeni asyǵa kútetinin jasyrmady.
“Men Báidibek aýdanynyń turǵynymen. Qalaǵa rámizder kúni úshin keldim. Rámizderdi qurmetteý árbirimizge júktelgen mindet. Biz memlekettik tilimizdi umytpaýymyz kerek. Kók týymyzdy jelbiretip, ánurandy maqtan tutyp aitýymyz kerek,- dedi Báidibek aýdanynyń turǵyny Gúlnár Imanqulova.
“Tuǵyry biik Týymyz el tarihyn álemge tanytar Eltańbamyz jáne kez-kelgenniń patriottyq rýhyn kóteretin Memlekettik Ánuranymyzben aibyndy el bola bildik. Sondyqtan da memlekettik rámizderimiz — táýelsizdigimizdiń aiǵaǵy dep bilýimiz kerek. Biyl memlekettik rámizderdiń qabyldanǵanyna 30 jyl. Men elimizdiń belsendi azamaty retinde kóp týymyzdy kókke jelbiretýge ýáde beremin. Sebebi bul memlekettiń negizgi nyshany bolyp tabylady”,- dedi qala turǵyny Nurdáýlet Tursynǵali.
Memlekettik rámizderimiz búginde shartarapqa keńinen tanyldy.
Qazaq Elin álem jurtshylyǵy moiyndady. Bizdiń Kók bairaǵymyz Birikken Ulttar Uiymynyń ǵimaraty aldynda tur, Qazaqstan Respýblikasynyń shetelderdegi Elshilikteri ǵimaratynyń mańdaishalaryna tigilgen. Al álemdik sport dodalarynda elimizdiń, onyń ishinde úshinshi megapolistiń sportshylary da jeńis tuǵyrynan kórinip, Ánuranymyzben birge Kók Týymyzdy biikke kóterip júr.
Birlik pen kelisimniń, ósip-órkendeýdiń nyshany – Memlekettik rámizderimiz arqyly Qazaq Eliniń abyroiy biiktep, halqymyzdyń rýhy asqaqtai bersin!
