Qyrǵyzstandyq MMA faiteri Medet Jeenáliev Ystyqkólde sýǵa batyp bara jatqan qyzdy qutqaramyn dep qaza tapty. Bul týraly Ystyqkól aýdandyq ishki ister bóliminiń baspasóz qyzmeti málimdedi, dep habarlaidy dalanews.kz.
Oqiǵa Baqty-Dolonotý aýylyndaǵy jaǵajaida bolǵan. Málimetke súiensek, kámeletke tolmaǵan tórt qyz kól jaǵasynda demalyp júrgen. Olardyń biri sýǵa túsý kezinde bata bastaǵan.
Osy sátte Medet Jeenáliev dosymen birge kómekke umtylyp, qyzdy qutqaryp qalǵan. Alaida sportshynyń ózi sýǵa ketip, kóz jumǵan.
Tótenshe jaǵdailar qyzmeti málimetinshe, faiterdiń denesi kelesi kúni tabylyp, týystaryna berilgen.
Aita keteiik, Medet Jeenáliev jeńil salmaqta óner kórsetken. Kásipqoi ringte tórt jekpe-jek ótkizip, onyń ekeýinde jeńiske jetken, ekeýinde jeńilgen.
