Sarapshynyń aitýynsha, sailaýǵa qatysýǵa partiianyń tanymaldyǵy men azamattardyń óz ómirine bergen baǵasy yqpal etedi. Qazaqstan Respýblikasy Prezidenti janyndaǵy Qazaqstan strategiialyq zertteýler institýtynyń bas ǵylymi qyzmetkeri Aigúl Zabirova qazirgi qazaqstandyq sailaýshynyń erekshelikteri týraly zertteý nátijelerin tanystyrdy, dep habarlaidy dalanews.kz.
Onyń aitýynsha, biyl alǵash ret Quryltai sailaýy tolyqtai partiialyq tizim boiynsha ótedi jáne bul sailaýshylar úshin jańa saiasi kezeńniń bastaýy sanalady.
Sarapshynyń sózinshe, institýt júrgizgen áleýmettik zertteý azamattardyń aldaǵy sailaýǵa qyzyǵýshylyǵy joǵary ekenin kórsetken. Respondentterdiń tórtten úsheýi sailaý kelesi jeksenbide ótse, mindetti túrde daýys berýge baratynyn aitqan.
«Bul sailaý naýqanynda saiasi partiialardyń qandai baǵdarlamalar usynyp, ózderin qalai kórsete alatyny mańyzdy. Degenmen sońǵy sheshimdi báribir sailaýshy qabyldaidy», – dedi Aigúl Zabirova.
Zertteý nátijesi taǵy bir qyzyqty úrdisti anyqtaǵan. Eger azamat óz otbasynyń sońǵy bir jyldaǵy jaǵdaiyn jaqsy dep baǵalasa, onyń sailaýǵa qatysý yqtimaldyǵy da joǵary bolady. Sondai-aq kelesi jyly ómiri jaqsarady dep senetin adamdardyń daýys berýge jáne belgili bir saiasi partiiany qoldaýǵa beiimdiligi joǵary ekeni baiqalǵan.
Óńirlik deńgeidegi zertteý de kútpegen nátijeler kórsetken. Sarapshynyń aitýynsha, sailaýǵa qatysýǵa óńirdiń ekonomikalyq damý deńgeii nemese jalpy óńirlik ónim kólemi emes, eki negizgi faktor kóbirek áser etedi.
«Birinshisi – saiasi partiianyń tanymaldyǵy. Ekinshisi – adamnyń ótken bir jyldaǵy ómirine bergen baǵasy», – dedi ol.
Aigúl Zabirova qazirgi zertteý aiasynda jekelegen kandidattardyń tanymaldyǵy qarastyrylmaǵanyn atap ótti. Onyń aitýynsha, institýt saiasi partiialardyń tanymaldylyǵyna ǵana taldaý jasaǵan.
«Qazir sailaýǵa qatysyp jatqan partiialardyń basym bóliginiń óz tarihy, qalyptasqan saiasi beinesi jáne qoǵamǵa belgili ókilderi bar. Al daýys berý kúnine deiin jalǵasatyn sailaýaldy naýqan azamattardyń saiasi kúshterdi qanshalyqty jaqsy tanýyna yqpal etedi», – dedi bas ǵylymi qyzmetker.
Sarapshynyń aitýynsha, qazirgi kezeńde sailaýshylardyń tańdaýy jekelegen kandidattardan góri saiasi partiialarǵa kóbirek baǵyttalǵan. Al kandidattardyń jeke tanymaldyǵy bul zertteý sheńberinde qarastyrylmaǵan.
