Quryltai depýtaty Jarqynbek Amantaiuly qaýipti prankter men tresh-strimder úshin jaýapkershilikti kúsheitýdi usyndy, dep habarlaidy dalanews.kz.
Ol Úkimetke «tresh-striming» uǵymyn zańnamalyq turǵyda naqty anyqtap, tikelei efirde zorlyq-zombylyqty, qaýipti prankterdi, qorlaý men qasaqana arandatýshylyq áreketterdi nasihattaǵany úshin jaýapkershilikti kúsheitýdi usyndy.
Sonymen qatar depýtat TikTok, Instagram, YouTube jáne basqa da platformalarmen birlesip, quqyqqa qaishy tikelei efirlerdi jedel anyqtap, buǵattaý jáne olardyń avtorlaryn anyqtaý tetigin qalyptastyrý qajettigin aitty.
Onyń pikirinshe, ruqsatsyz tikelei efirge shyǵarylǵan nemese adamnyń ar-namysy men qadir-qasietine ziian keltirgen jaǵdaida jábirlenýshilerdiń quqyqtaryn qorǵaý mehanizmderin de kúsheitý qajet.
«Milliondaǵan adam kún saiyn TikTok, Instagram jáne basqa platformalardy paidalanady. Tikelei efirlerdiń aýditoriiasy ósip keledi. Bul – tsifrlyq damýdyń bir kórinisi. Biraq onyń keri jaǵy da bar. Tikelei efirlerde ádepsiz sózder, adamdardy qorlaý men kemsitý jii aitylady, qaýipti prankter jasalady. Keibir strimerler muny ádeii isteidi. Sebebi dóreki ári arandatýshylyq kontent kóp qaralym jinaidy. Al qaralymdar laik pen donatqa, keide jarnamadan túsetin tabysqa ainalady. Osylaisha kei jaǵdaida quqyqqa qaishy áreketter aqsha tabý quralyna ainalady», – dedi depýtat.
Onyń aitýynsha, áleýmettik jeliler qazirgi qoǵam ómiriniń ajyramas bóligine ainaldy. Depýtat mundai quqyqqa qaishy kontent taratqan birqatar áleýmettik jeli qoldanýshylarynyń ákimshilik jaýapkershilikke tartylǵanyn da atap ótti.
«Bul – máseleniń bar ekenin kórsetetin naqty fakt», – dedi ol.
Amantaiuly Memleket basshysy Qasym-Jomart Toqaevtyń «Zań jáne tártip» qaǵidatyn qoǵamnyń ortaq qundylyǵyna ainaldyrý qajettigin birneshe ret aitqanyn eske saldy.
«Bul qaǵidat jańa Konstitýtsiianyń negizgi talaptarynyń birine ainaldy. Sondyqtan zań men tártip talaptary tsifrlyq keńistikte de birdei qatań ári naqty saqtalýy tiis. “Amanat” partiiasy buǵan erekshe mán beredi. Áleýmettik jelilerdegi tikelei efirler barǵan saiyn kommertsiialyq sipat alyp keledi. Keibir strimerler kórermen tartý úshin ádeii janjal uiymdastyrady. Adamdardy mazaqtap, qorlaidy. Tikelei efirlerde tipti aitýǵa uiat áreketterdi de jii jasaidy», – dedi Quryltai múshesi.
Depýtat mundai efirlerdi eresektermen qatar kámeletke tolmaǵandardyń da kóre alatynyna nazar aýdardy.
Ol Qazaqstan azamatynyń Qytaida prank jasaǵany úshin jaýapkershilikke tartylǵanyn mysal retinde keltirdi. Onyń aitýynsha, azamat qoǵam nazaryn aýdarý maqsatynda prank jasap, Qazaqstannyń bedeline nuqsan keltirgen.
«Basqa elderde mundai áreket asa mádenietsizdik ári zań buzýshylyq retinde baǵalanyp, qatań qoǵamdyq synǵa ushyraidy. AQSh-ta Federaldyq saýda komissiiasy (FTC) tsifrlyq jarnamanyń ashyqtyǵy men jarnamalyq kontentti tiisti túrde belgileý talaptaryn belgileidi. Eýropalyq odaqtyń Digital Services Act (DSA) zańy platformalardyń zańsyz kontent úshin jaýapkershiligin jáne paidalanýshylardyń quqyqtaryn qorǵaý tetikterin kúsheitti», – dedi depýtat.
Onyń pikirinshe, qazirgi tsifrlyq ortada quqyqtyq jaýapkershilik pen kommertsiialyq múdde qatar toǵysyp otyr.
Depýtat osyǵan bailanysty Úkimetke qaýipti prankter men tresh-strimingke qatysty zańnamany naqtylaýdy, quqyqqa qaishy tikelei efirlerdi jedel anyqtap, buǵattaý tetigin engizýdi jáne mundai kontent avtorlarynyń jaýapkershiligin kúsheitýdi usyndy.
