Biyl qasietti Qurban ait meiramyn musylmandar 6, 7 jáne 8 maýsym kúnderi atap ótedi. Almatynyń jeti aýdanynda osyǵan orai úlken meshitterge jaqyn jerde qurban shalatyn 12 arnaýly oryn ashyldy. Qalanyń bas imamy Tólebi Ospan men Din isteri basqarmasynyń bólim basshysy Doshan Rahmetildaev Almaty qalasynyń Óńirlik kommýnikatsiialar qyzmetinde osylai dep málim etti, – dep habarlaidy Dalanews.kz
6 maýsym kúni tańǵy saǵat 06:00-de qalanyń 56 meshitinde Ait namazy oqylady. Namazdan keiin birden qurbandyq shalý rásimi bastalady.
«Qurban ait - bul jai ǵana rásim emes, bul - janashyrlyq pen saýapty is. Bul kúnderi muqtaj jandarǵa qol ushyn sozyp, baýyrmal bolyp, izgilikke umtylǵan durys. Qalamyzdaǵy turǵyndardyń barlyq igi nieti men amalyn Alla qabyl etsin», - dedi Almaty qalasynyń bas imamy Tólebi Ospan.
Onyń aitýynsha, jyldaǵydai arnaýly oryndarda mal satylyp, qurbandyq shalynyp, et taratylady. Barlyq oryn taza, shariǵat normalaryna da sai keledi. Dini rásimdi meshittiń qyzmetkerleri baqylap otyrmaq.
Sondai-aq, qaladaǵy 56 meshitte muzdatqysh ornatylyp, etti tońazytatyn kóliktermen de qamtamasyz etilgen. Qala turǵyndary shalǵan qurbandyǵyn jaqyn mańdaǵy meshitke aparyp, qaiyrymdylyqqa arnasa da bolady.
Doshan Rahmetildaevtyń aitýynsha, barlyq jerde quqyq qorǵaý organdarynyń, sanitarlyq qyzmettiń jáne veterinarlyq baqylaý inspektsiiasynyń mamandary kezekshilik atqarady. Olar mal soiǵan kezde sanitarlyq talaptyń saqtalýyn qadaǵalamaq. Sonymen qatar, qoǵamdyq tártip kúsheiip, ruqsat etilmegen jerde zańsyz saýda jasaýǵa jol bermeidi.
Sonymen qatar, qurban.muftyat.kz onlain-servisy ashylǵan. Bul sait arqyly qashyqtan qurban shalýǵa tapsyrys berip, ony baqylai alasyz. Sondai-aq, et alǵysy kelgen muqtaj jandar da osy sait arqyly ótinish bere alady.
Dini sharalardan bólek, dástúrli merekelik baǵdarlama da josparlanǵan. Qurban ait merekesine orai barlyq meshitterde kiiz úiler tigilip, merekelik dastarhan jaiylady, ulttyq sport oiyndary ótkiziledi. Balalarǵa batýttar, táttiler men túrli oiyndar daiyndalǵan. Sonymen qatar, din qyzmetkerleri balalar úiine baryp, búldirshinderge syilyqtar tabystap, olardy ait merekesimen quttyqtamaq.
Almaty qalasynda qurban shalý ruqsat etilgen oryndardyń tizimi:
Alataý aýdany boiynsha:
1. «Myrzahmet» meshiti. Qarasý sh/a, Soltústik ainalma joly kóshesi, 15.
2. «Ásker ata» meshiti. Aigerim-1 sh/a, Benberin kóshesi, 18/4.
3. «Alǵabas» meshiti. Alǵabas sh/a, Saigúbe kóshesi, 6.
Bostandyq aýdany boiynsha:
1. «Baqytkeldi» meshiti. Han-Táńiri sh/a, Dýlati kóshesi, 27/11.
Medeý aýdany boiynsha:
1. «Omar ibn ál-Hattab» meshiti. Jýkov kóshesi, 136 A.
2. «Amanqul ata» meshiti. T. Bigeldinov kóshesi, 5.
3. «Fatima» meshiti. Sh. Jánibek kóshesi, 148.
4. «Raiymbek batyr» meshiti. Dýman-1 sh/a, Han Táńiri kóshesi, 15.
5. «Arafat» meshiti. Ibragimov kóshesi, 5 A.
Naýryzbai aýdany boiynsha:
1. «Qalqaman-2» meshiti. Qalqaman-2 sh/a, Aspandiiarov kóshesi, 84.
Túrksib aýdany boiynsha:
1. «Qairat» meshiti. Qairat sh/a, Sarymoldaev kóshesi, 22.
Jetisý aýdany boiynsha:
1. «Ál-Mádina» meshiti. Fedorov kóshesi, 12.
«Qala turǵyndary men qonaqtarynan joǵaryda atalǵan mekenjaida ǵana maldy satyp alý jáne soiý qajettigin eskertemiz», - dep atap ótti spikerler.
