Atyraý oblysynyń Qulsary qalasynda jańa oqý jylynyń basynda 1200 oryndyq №26 mektep ashyldy. Mekteptiń ishi zamanaýi quraldarmen jabdyqtalǵan. Onda jańa kabinetter, sport zaldary, robototehnika úiirmesi, beinebaqylaý júiesi jáne politsiia beketi bar. Alaida mektepke aparatyn jaiaý júrginshiler joly salynbaǵan, dep habarlaidy dalanews.kz.
Halyqstan málimetinshe, jańbyr jaýsa, mektepke baratyn jol balshyqqa ainalady. Sonyń saldarynan balalar sabaqqa jetkenshe aiaq kiimi men kiimderin bylǵap alady.
Qala turǵyndary osy máseleni sheshýdi surap, Atyraý oblysynyń ákimi Bolat Aqsholaqovqa úndeý jasady.
"Jańa ári ádemi №26 mektep salynǵanyna rizamyz. Biraq jańbyr jaýǵan kezde balalar mektepke osyndai jaǵdaida barýǵa májbúr. Olar qaýipsiz ári taza jolmen júrýi úshin trotýar salyp berýdi suraimyz", – delingen úndeýde.
Bul mektep buǵan deiin de el nazaryna ilikken. Byltyr qyrkúiekte qurylys aiaqtalmai turyp, sport zaly shatyrynyń bir bóligi opyrylyp túsken edi.
Jobanyń operatory Samruk-Kazyna Construction sol kezde merdigerdiń shatyr ústine alty tonnadan astam qurylys materialyn jinap qoiǵanyn habarlaǵan. Aldyn ala málimet boiynsha, shatyrdyń zaqymdanýyna osy jaǵdai sebep bolǵan.
Mektep ashylar aldynda nysandy oblys ákimi ózi teksergen. Oǵan oqý kabinetteri, sport alańdary, ashana men qaýipsizdik júieleri kórsetilgen. Óńir basshysy mektepti jáne onyń ainalasyndaǵy infraqurylymdy oqý jylyna tolyq daiyndaýdy tapsyrǵan.
Soǵan qaramastan, mektepke aparatyn trotýar salynbaǵan. Endi jańbyrly kúnderi oqýshylar jańa mektepke balshyq keship barýǵa májbúr.
