Atyraý oblysynyń Qulsary qalasynda 300-den asa jeke turǵyn úi áli de sý astynda tur, - dep habarlaidy Dalanews.kz.
Tótenshe jaǵdailar ministrliginiń baspasóz qyzmeti málimetine súiensek, eldi mekende sý tasqyny bolǵan sátten bastap QR TJM qutqarýshylar kúshimen 2564 úiden sý sorylǵan.
"Jumys táýlik boiy jalǵasyp jatyr. Qazirdiń ózinde 3 million tekshe metrden asa sý soryldy", - dep jazylǵan vedomstvo málimetinde.
Aita keteiik, buǵan deiin Atyraý oblysynyń tótenshe jaǵdai jónindegi jedel shtaby ókilderi Qulsary qalasyndaǵy ómir tasqynnan keiin birtindep qalpyna kele bastaǵanyn málimdegen bolatyn.
Vedomstvo málimetinshe, qalalyq azyq-túlik dúkenderi men sýpermarketter, sondai-aq, qoǵamdyq kólikter óz qyzmetin qaita bastaǵan.
Sonymen qatar, quzyrly organdar sý tasqynynan zardap shekkenderge kómek kórsetý máselesin qarastyryp jatqany aityldy.
"Qazirgi ýaqytta jedel shtab sý tasqyny kezinde sý basqan aýmaqtardy qurǵatýmen ainalysyp jatyr. Zań boiynsha, tabiǵi sipattaǵy tótenshe jaǵdai saldarynan azamattarǵa keltirilgen shyǵyndy óteý maqsatynda arnaiy komissiia qurylady", - degen edi Jylyoi aýdany ákiminiń orynbasary Gúlnafis Aishýaqova.
