Qulsary qalasynda 15 mamyrda narazylyq bastaldy. 300-den asa narazy turǵyn aýdandyq ákimshilik ǵimaratynyń qasyna palatka tikti, - dep habarlaidy Dalanews.kz "Aq Jaiyq" basylymyna siltep.
"Biz talabymyz oryndalmasa ketpeimiz, tura beremiz. Óitkeni barar jerimiz qalmady, sol sebepten úidi baǵalaý qorytyndysyn tez shyǵaryp bersin",-dep aiqalady narazy jurtshylyq.
"Aqsha qolǵa berilsin", "Úidiń sharshy metrin naryq baǵasy 400 myń teńgemen baǵalansyn" degen urandardy qoldaryna alyp shyqqan. Narazy toptar aýdandyq ákimshilik ǵimaratynyń ishinde, syrtynda turǵan. Áskeriler men politsiia narazylyq toptardy syrttai baqylaýmen bolǵan. Narazy halyqtyń aldyna oblystyq máslihatynyń tóraǵasy Mýsa Hairýllin shyqty.
"Men sý tasqyny kezinde sizdermen bir ai birge boldym. Joǵarǵy jaqqa talaptaryńyzdy jetkizdim... Biraq sharshy metr 400 myń teńge bolmaidy. Bir saǵat oilanyp, aqyldasýǵa múmkindik beremiz. Sabyr saqtaiyq", - dedi ol.
1,5 saǵattan keiin kópshilik aldyna oblys ákimniń orynbasary Jasulan Bisembiev shyqty.
"Biz aqyldasa kele úidiń sharshy metrin 200-240 myń teńgemen baǵalaimyz dep sheshtik. Qazaqstanda baǵa solai, aǵaiyn, túsinińizder. Odan artyq bolmaidy. Máselen, 200 sharshy metr úiińiz bolsa, 40 million teńge alasyz. Baǵalaý qorytyndysyn bastadyq, endi osylai jalǵasa beredi", -dedi ol.
Biraq oǵan jinalǵandar kónbedi, narazy únmen shýlap qoia berdi.
"Baǵalaý nátijesin aldym. Úiimdi 12 million teńgege baǵalapty, oǵan úi sala da, satyp ta ala almaimyn", - dedi qala turǵyndarynyń biri.
Aita keteiik, kóktemgi qarǵyn sýdan 2900 adam jáne júzdegen kommertsiialyq nysan búlingen bolatyn.
