Aýyl sharýashylyǵy ministri Aidarbek Saparovqa S.Seifýllin atyndaǵy Qazaq agrotehnikalyq ýniversitetinde ótken selektsiia jáne tuqym sharýashylyǵyn damytý máseleleri boiynsha respýblikalyq keńes aiasynda elimizdegi birinshi agrotehnopark tanystyryldy, dep habarlaidy Dalanews.kz
Agrotehnopark qurý ýniversitettiń agrarlyq ǵylymdy damytý, praktikalyq baǵyttaǵy bilim berýdi jetildirý jáne ekonomikanyń naqty sektorymen biriktirý salasyndaǵy júieli jumysynyń zańdy jalǵasy deýge bolady.
Agrotehnoparktiń basty maqsaty - biznes-inkýbatsiia, innovatsiialyq kompaniialardy qoldaý jáne AÓK salasyndaǵy joǵary tehnologiialyq jobalardy damytý úshin zamanaýi orta qurý. Ortalyq agrotehnologiialardy synaqtan ótkizýge jáne kórsetýge, jobalardy ǵylymi-zertteý kezeńinen naryqqa deiin súiemeldeýge, biznes úshin tehnologiialyq táýekelderdi azaitýǵa jáne innovatsiialardy laboratoriiadan óndiriske tezirek jetkizýge arnalǵan. Taǵy bir mańyzdy baǵyt - halyqaralyq ǵylymi-tehnologiialyq yntymaqtastyqty damytý.
Aidarbek Saparov ortalyqtyń infraqurylymy, laboratoriialyq bazasy jáne óndiristik-injenerlik múmkindikterimen tanysty. Agrotehnoparktiń jalpy aýdany shamamen 1000 sharshy metrdi quraidy. Onyń qurylymynda tájiribelik jáne pilottyq jumystarǵa arnalǵan metall óńdeý tsehy bar óndiristik-injenerlik blok, rezidentterge arnalǵan keńse keńistigi, sondai-aq tolyq tsikldi laboratoriialyq keshen qarastyrylǵan.
Sondai-aq, quramyna aýyl sharýashylyǵy daqyldaryn molekýlalyq-genetikalyq zertteý, agrobiotehnologiia jáne mikrobiologiia zerthanalary, fizika-himiialyq taldaý, synama daiyndaý jáne analitikalyq zertteýge arnalǵan Qazaqstan–Avstraliia innovatsiialyq ortalyǵy kiredi.
Aidarbek Saparov agrotehnopark - agrarlyq ǵylymdy jańǵyrtý jáne ǵylymi zertteýlerdi tiimdi naryqqa shyǵarý júiesin qurýdaǵy mańyzdy qadam ekenin atap ótti.
«Búgingi tańda ǵylymi sheshimderdiń laboratoriia qabyrǵasynda qalmai, aýyl sharýashylyǵy óndirýshisine jetýi jáne naqty ekonomikalyq nátije berýi óte mańyzdy. Agrotehnopark ǵalymdar men agrobiznes ókilderin bailanystyratyn kópir bolýǵa tiis», — dedi ministr.
Ýniversitet rektory Qanat Tireýov óz sózinde agrotehnopark AÓK salasynda tehnologiialyq kásipkerliktiń jańa mádenietin qalyptastyrý, jańa býyn mamandaryn daiyndaý jáne ǵylymi zertteýlerge investitsiia tartý úshin jaǵdai jasaitynyn atap ótti.
«Ortalyq jas ǵalymdar, startap-komandalar jáne básekege qabiletti otandyq tehnologiialardy jasaý men engizýge qyzyǵýshylyq tanytqan indýstrialdy seriktester úshin yntymaqtastyń alańyna ainalady», — dedi rektor.
Agrotehnoparktiń qyzmeti aýyl sharýashylyǵy daqyldarynyń jańa sorttary men býdandaryn, zamanaýi biopreparattar men injenerlik sheshimderdi naryqqa jyldam shyǵarý, agroóndiristiń ónimdiligi men turaqtylyǵyn arttyrý, sondai-aq otandyq AÓK eksporttyq áleýetin nyǵaitý úshin mańyzdy ról atqarmaq.
Sondai-aq ýniversitet bazasynda «Agrarlyq ǵylym jetistikterin óndiriske engizý – agroónerkásip kesheniniń turaqty damýynyń kepili» atty respýblikalyq seminar-keńes ótti.
Is-sharaǵa «Ulttyq agrarlyq ǵylymi-bilim berý ortalyǵy» aktsionerlik qoǵamy, onyń enshiles uiymdary, ǵylymi qaýymdastyq ókilderi jáne oblys ákimderiniń orynbasarlary qatysty.
Jiynda Aýyl sharýashylyǵy ministri Aidarbek Saparov selektsiia men tuqym sharýashylyǵyn damytý eldiń azyq-túlik qaýipsizdigin qamtamasyz etýdegi negizgi tetik ekenin atap ótti.
