Rýdnyi qalasyndaǵy bir kásiporynnyń uńǵymadan arnaiy ruqsatsyz sý alyp kelgeni anyqtaldy, dep habarlaidy Dalanews.kz Sý resýrstary jáne irrigatsiia ministrligine silteme jasap.
Kásiporynǵa zań buzǵany úshin Ákimshilik quqyq buzýshylyq týraly kodekstiń 141-babynyń 2-bólimi, iaǵni «Sýǵa memlekettik menshik quqyǵyn buzý» baby boiynsha 1 671 100 teńge kóleminde aiyppul salyndy. Bul - Tobyl–Torǵai bassein inspektsiiasy jyl basynan beri salǵan eń iri aiyppul.
2025 jyly inspektsiia Ákimshilik quqyq buzýshylyq týraly kodekstiń 141-babyn buzǵan bes derek tirkedi. Osy buzýshylyqtar úshin jalpy somasy 2 339 540 teńge aiyppul salyndy. Barlyq zańbuzýshyǵa arnaiy sý paidalaný ruqsatyn alý jóninde nusqama berilip, tiisti usynystar jasaldy.
«Jańa Sý kodeksine engizilgen qadaǵalaý ókilettikteri bassein inspektsiialaryna azamattardyń ótinishterine, sý zańnamasyn buzý týraly málimetterge jáne monitoring nátijelerine jedel áreket etýge múmkindik beredi. Inspektorlar oqiǵa ornyna dereý baryp, zańbuzýshylyq rastalǵan jaǵdaida ákimshilik aiyppul sala alady. Bul zańsyz sý alýǵa jáne sýdyń «qara naryǵyna» qarsy tiimdi kúres júrgizýge jol ashady»,– dedi Tobyl-Torǵai bassein inspektsiiasynyń basshysy Almat Abjanov.
