Biyl Qostanai oblysynda Ahmet Baitursynov atyndaǵy Qostanai halyqaralyq áýejaiy jekeshelendirýge daiyndalyp jatyr, – dep habarlaidy Dalanews.kz Alau.kz saityna silteme jasap.
Áýejai buǵan deiin eki ret aýktsionǵa shyǵarylyp, qojaiynyn tappaǵan bolatyn. Aitalyq, sońǵy ret 2018 jyly Qostanai áýejaiy aýktsionǵa qoiylǵany esimizde.
Osydan keiin áýejai respýblikalyq balanstan alynyp, Qostanai oblysy ákimdiginiń menshigine berilgen-di. Ákimdik áýejai ǵimarat men ushý-qoný jolaǵyn da jóndeýdi bastaǵan bolatyn.
Qazir qarjy basqarmasynyń málimetinshe, ákimdik nysandy naqty qalai jekeshelendirý máselesin qarastyryp jatsa kerek.
– Ákimdik balansyndaǵy memlekettik múlikti jekege shyǵarýdyń kóptegen joldary bar. Aldaǵy ýaqytta nysan satyp alý quqyǵymen senimgerlik basqarýǵa berilýi múmkin. Áýejai túri jolmen satýǵa, tenderge nemese aýktsionǵa qoiylýy yqtimal. Memlekettik organdar tarapynan jergilikti deńgeide memlekettik komissiia bul úrdisti barynsha baqylaityn bolady, – deidi Qostanai oblysy ákimdiginiń qarjy basqarmasynyń basshysy Alma Júsipova.
Qarjy basqarmasynyń ókilderiniń aitýynsha, Qostanai oblysyndaǵy 2021-2025 jyldarǵa arnalǵan jekeshelendirýdiń keshendi jospary merziminen buryn aiaqtalýy múmkin.
Osylaisha, josparlanǵan nysandardyń kópshiligi jeke adamardyń qolyna ótti. Osylaisha oblystaǵy BAQ pen turǵyn úi-kommýnaldyq sharýashylyq nysandary 600 mln teńgege satylǵan.
Qarjy bólimi qazir jekeshelendirýdiń barlyq kúshin áýejaiǵa baǵyttaýda. Qazirdiń ózinde ákimdik aktsiianyń 49 paiyzyn ǵana satýǵa daiyn.
Áýejai strategiialyq nysan bolǵandyqtan onyń negizgi baqylaýshy paketi memleket qolynda qalady. Qazir resmi málimet boiynsha kásiporyndy baǵalaý jumystary júrip jatyr. Bul jumys sáýir aiynda aiaqtalady. Al 2017 jyly áýejai satylymǵa qoiylǵanda 862 million teńgege baǵalanǵan bolatyn.
