Qostanaidaǵy erekshe qajettiligi bar balalarǵa arnalǵan áleýmettik qyzmet kórsetý ortalyǵynda 14 jastaǵy jasóspirimniń qaitys bolýyna qatysty jańa málimetter jariialandy. Quqyq qorǵaý ortalyǵyna mekeme qyzmetkerleri balalar jatqan bólmelerde konditsioner ornatylmaǵanyn, al salqyndatqysh qurylǵylar tek ákimshilik kabinetterinde bolǵanyn aityp, máseleni tekserýdi suraǵan, dep habarlaidy dalanews.kz.
Málimetke sáikes, Qostanai oblysy ákimdigi Jumyspen qamtýdy úilestirý jáne áleýmettik baǵdarlamalar basqarmasyna qarasty arnaiy áleýmettik qyzmet kórsetý balalar ortalyǵynda (Qostanai qalasy, Krasnoselskaia kóshesi, 22) 2026 jylǵy 28 shildede kúndizgi uiqy kezinde 14 jastaǵy múgedektigi bar bala kóz jumǵan.
Internat qyzmetkerleriniń aitýynsha, balanyń júregi toqtap qalǵan. Olar qaiǵyly jaǵdaiǵa ǵimarat ishindegi qatty ystyq pen aýa jetispeýi áser etýi múmkin ekenin joqqa shyǵarmaidy. Degenmen ólimniń naqty sebebi meditsinalyq saraptama men jan-jaqty tekserýdiń qorytyndysynan keiin ǵana belgili bolatyny atap ótilgen.
Quqyq qorǵaý ortalyǵynyń málimetinshe, mekeme qyzmetkerleri balalar jatqan bólmelerge konditsioner ornatýdy uzaq ýaqyt boiy surap kelgen. Alaida olardyń ótinishteri oryndalmaǵan. Soǵan qaramastan konditsionerler ákimshilik-basqarý qyzmetkerleriniń kabinetterine ornatylǵany aitylǵan.
Ortalyq bul aqparat rastalsa, erekshe kútimdi qajet etetin balalardyń emes, aldymen ákimshilik qyzmetkerlerdiń jaily jaǵdaimen qamtamasyz etilýi zańdy suraq týǵyzatynyn málimdedi.
Sondai-aq quqyq qorǵaýshylar qaiǵyly oqiǵaǵa bailanysty jan-jaqty ári obektivti tekserý júrgizýdi talap etti. Olar balalar jatqan bólmelerdegi naqty temperatýra men ylǵaldylyqty, jeldetý júiesiniń jumysyn, klimattyq jabdyqtardyń jaǵdaiyn, balaǵa meditsinalyq kómektiń ýaqytyly kórsetilgen-kórsetilmegenin, sondai-aq mekeme basshylyǵy men jaýapty memlekettik organdardyń áreketi nemese áreketsizdigin tekserý qajet dep esepteidi.
Budan bólek, qyzmetkerler konditsioner ornatý máselesin birneshe ret kótergeni, biraq bul ótinishterdiń tiisti deńgeide qaralmaǵany aityldy. Eger bul derekter rastalsa, jaýapty tulǵalardyń kim bolǵany jáne balalardyń qaýipsizdigin qamtamasyz etý úshin nege ýaqytyly shara qabyldanbaǵany anyqtalýy tiis.
Quqyq qorǵaý ortalyǵy bul másele turmystyq qolailylyq týraly emes, memleket qamqorlyǵyndaǵy balalardyń ómiri men qaýipsizdigi týraly ekenin atap ótti. Sondai-aq uiym Qostanai oblysy ákimdiginen, Jumyspen qamtýdy úilestirý jáne áleýmettik baǵdarlamalar basqarmasynan, densaýlyq saqtaý jáne quqyq qorǵaý organdarynan resmi ári mazmundy túsinikteme kútetinin jetkizdi.
