Qonaev qalasynyń óneri halyqaralyq arenada biikten kórindi. Belarýs Respýblikasynyń Vitebsk qalasynda 14–20 shilde aralyǵynda ótken «Slavian bazary – Vitebsk-2026» halyqaralyq estradalyq án oryndaýshylar baiqaýynda Qonaev qalalyq mádeniet úiiniń ánshisi Aqerke Amaliat I orynǵa ie boldy, dep habarlaidy dalanews.kz.
Osy aitýly jeńiske orai Qonaev qalasynyń ákimi Ashat Berdihanov ónerpazdy arnaiy qabyldap, Alǵys hat pen 1 million teńgeniń sertifikatyn tabystady.
«„Slavian bazary“ – álemdik deńgeidegi bedeldi óner baiqaýlarynyń biri. Biyl 19 memlekettiń talanttary baq synaǵan dodada sizdiń jeńiske jetýińiz – tek jeke jetistik emes, bul Qonaev qalasynyń mádeni áleýetiniń, qazaq óneriniń biik deńgeiin álemge tanytqan úlken jeńis. Barsha qala turǵyndarynyń atynan sizge alǵysymdy bildiremin. Alar asýyńyz biik, óner jolyńyz árdaiym jarqyn bolsyn! Sizge zor densaýlyq, sarqylmas shabyt jáne jańa jeńister tileimin!» – dedi shahar basshysy.
Saltanatty kezdesýde ánshini qoldaǵan demeýshi, Qonaev qalalyq Qoǵamdyq keńesiniń tóraǵasy Sergei Gorianoi da quttyqtap, izgi tilegin jetkizdi.
Óz kezeginde Aqerkeniń anasy Gúlnur Zulqarshynqyzy qyzynyń jetistigine qýanyp, qoldaý kórsetken Qonaev jurtshylyǵyna alǵysyn bildirdi. Kezdesý sońynda ol qala ákimine óziniń tól týyndysyn tartý etip, rizashylyǵyn jetkizdi.
