Ál-Farabi aýdanynyń qylmystyq ister jónindegi sotynda 19 mamyr kúni burynǵy sport jáne mádeniet vitse-ministri Erlan Qojaǵapanovty 3 jylǵa bas bostandyǵynan aiyrý týraly úkim shyǵaryldy. Sýdia eks-sheneýniktiń jáne onyń otbasynyń múlki – elitalyq jyljymaityn múlik, kólikter, kriptovaliýta men qarajattan buǵatty alyp tastady. Al osy is boiynsha 5 jylǵa sottalǵan kásipker Lázzat Kókkózovanyń aktivteri – jyljymaityn múlikten bastap tsifrlyq valiýtalarǵa deiin – áli kúnge deiin buǵattaýly. Sottalǵandardyń bul iste qandai múlki bar ekeni anyqtaldy, dep habarlaidy Dalanews.kz.
Erlan Qojaǵapanov laýazymdyq ókilettikterin teris paidalanǵany úshin kináli dep tanyldy. Sot nusqasy boiynsha, ol 2018 jyly Petropavlda Qazaqstan men Reseidiń prezidentteri Nursultan Nazarbaev pen Vladimir Pýtin qatysqan óńiraralyq yntymaqtastyq forýmyn uiymdastyrý tenderin Success K kompaniiasyna zańsyz alyp bergen. Nátijesinde, Success K direktory Lázzat Kókkózova memleket biýdjetiniń 1 milliard teńgeden astam qarajatyn iemdengen.
Lázzat Kókkózova asa iri kólemde alaiaqtyq jasaǵany úshin kináli dep tanylyp, 5 jylǵa bas bostandyǵynan aiyryldy.
Memleketke keltirilgen 1 milliard 9 million teńge shyǵyndy óteý mindeti Lázzat Kókkózovaǵa júkteldi. Erlan Qojaǵapanov bul ótemnen bosatyldy, sondyqtan onyń múlkine salynǵan buǵat tolyqtai alynyp tastaldy. Buǵat alynǵan aktivterdiń arasynda: kriptovaliýta, 30 myń dollar qolma-qol aqsha jáne úsh garaj bar, degenmen Qojaǵapanov otbasynyń naqty ieligindegi aktivter budan áldeqaida kóp.
Eks-vitse-ministr Erlan Qojaǵapanovqa ne tiesili?
CMN.kz málimetinshe, resmi túrde Erlan Qojaǵapanovqa arnaiy kripto-ámiiandardaǵy 0,17 bitkoin, 1,9 Ethereum tokeni, 2,19 Liberty Token, Almaty qalasyndaǵy úsh garaj, shamamen 2 million teńgeden astam aqsha men qolma-qol 30 myń dollar tiesili ekeni kórsetilgen. Burynǵy vitse-ministr úshin bul óte qarapaiym aktivter siiaqty kórinedi.
Sýdia eks-sheneýniktiń múlkin tizgennen keiin, Omarova degen azamatshanyń aktivterin atady. Bul azamatsha – shamasy, Erlan Qojaǵapanovtyń jubaiy nemese jaqyn týysy bolýy múmkin. Omarovanyń atyna Almatydaǵy elitaly aýdandardyń birinde 14 sotyq jer telimi men aýdany 686 sharshy metr bolatyn úlken záýlim úi tirkelgen.
Bul alyp eki qabatty úi – Almatydaǵy «Jailaý» golf-klýbynyń janynda biryńǵai stilde salynǵan 38 elitalyq kottedjdiń biri. Záýlim úiler biik qorshaýmen qorshalǵan jekemenshik aýmaqta ornalasqan.
Jaqyn ornalasqan úilerdiń satylymǵa qatysty jarnamalarynda bul múlik «ǵajaiyp villa», «prestijdi aýdanda ornalasqan erekshe nysan» retinde sipattalǵan.
«Jóndeý jumystary tek premiým-klass italiialyq materialdarmen, dizainerdiń qatań baqylaýymen jasalǵan, bul úige erekshe stil men sándilik beredi», – dep kórsetilgen habarlandyrýlarda.
Úidiń ishinde: qonaq bólme, baqqa shyǵatyn ashana, balalar bólmesi, SPA-aimaǵy, bassein, garderob bólmeleri jáne qoimalar bar.
Osy elitaly aýdandaǵy mundai úidiń naryqtaǵy quny – 2,89 milliard teńge. Bul qylmystyq is boiynsha memleketke keltirilgen zalal somasynan úsh ese kóp.
Sondai-aq, Omarovanyń atynda aq tústi Lexus RX500 (2020 jyly shyqqan) kóligi tirkelgen. Taǵy bir kólik – Mercedes-Benz V250 (2018 jyly shyqqan) Qojaǵapanova J. esimdi tulǵanyń – boljam boiynsha, Erlan Qojaǵapanovtyń qyzy Jámilániń atyna tirkelgen.
Jámilá Qojaǵapanovanyń atyna Almatynyń ortalyǵyndaǵy elitalyq «Sálem» turǵyn úi kesheninde páter tirkelgen. Qazir bul turǵyn úi keshenindegi páterlerdiń naryqtaǵy baǵasy 200 million teńgeden bastalady.
Lázzat Kókkózovanyń ieliginde ne bar?
Erlan Qojaǵapanov pen onyń otbasy sot sheshimimen múlikterin tolyq qaitaryp alǵan bolsa, Lázzat Kókkózova men onyń jaqyndary keltirilgen shyǵyndy ótegenge deiin múlikteriniń buǵattan bosatylýyn kútýi tiis nemese aktivteri qaryzdy jabý úshin tárkilenýi múmkin.
«Arest qoiylǵan múlikti azamattyq talapty qanaǵattandyrý, materialdyq zalaldy óteý maqsatynda saqtap qalý qajet», – dep sýdia sheshimdi oqydy.
Sotta belgili bolǵandai, biznesvýmenniń ieliginde: 4,8 mln teńge men 2800 dollar qolma-qol aqsha jáne ártúrli kólemdegi kriptovaliýtalar bar: FDC (0,000090), USDE (0,0097), MBL (0,97), DTS (0,0033), VIN jáne ETH (árqaisysy 0,0168), sondai-aq basqa kriptovaliýtalardyń iri kólemderi – shamamen 129,36 jáne 134,456 birlik.
Bul onyń aktivteriniń bir bóligi ǵana. Lázzat Kókkózova Astanadaǵy «Kólsai» turǵyn úi kesheninde eki páter men eki avtoturaq ornyna ie. Qazir bul turǵyn úi keshenindegi páterler naryqta keminde 45 million teńgeden satylýda. Sonymen qatar biznesvýmen Almaty qalasy Áýezov aýdanyndaǵy «Dostyq» shaǵyn aýdanynda jeke úige ielik etedi.
Onyń biznes aktivterine Almaty oblysynda sharýa qojalyǵy jáne 2012 jylǵy Toyota Land Cruiser Prado kóligi kiredi.
Lázzat Kókkózovanyń kúieýiniń ieligindegi otbasylyq aktivter de áserli: Qaraǵandy qalasynda (Qazybek bi aýdany) eki jer telimi, óndiristik baza, qosymsha qurylystar men sý uńǵymasy bar. Sondai-aq Almaty oblysy Eńbekshiqazaq aýdanynda taǵy bir jer telimi jáne Qaraǵandy oblysy Topar aýylyndaǵy demalys aimaǵy bar. Kólikterdiń arasynda – 2012 jylǵy Toyota Camry avtokóligi tirkelgen.
Lázzat Kókkózovanyń qyzy Aiymnyń aktivterine Astana qalasyndaǵy jeke úi men anasy siiaqty sol turǵyn úi keshenindegi páter kiredi. Onyń menshiginde 2018 jylǵy Toyota Hiace avtokóligi bar.
Sotta Lázzat Kókkózova óziniń qylmystyq qýdalaýǵa ushyraýyn Erlan Qojaǵapanovpen bailanystyrǵan bolatyn. Eks-sheneýnik óz kezeginde kinásin moiyndamai, kýágerlerge Sybailas jemqorlyqqa qarsy qyzmet tarapynan qysym jasaldy dep málimdegen.
Prokýror sot jaryssózinde Erlan Qojaǵapanovqa 7 jyl, al Success K basshysy Kókkózovaǵa 8 jyl bas bostandyǵynan aiyrýdy suraǵan edi.
