Sátbaev ýniversitetiniń bazasynda ótken 72 saǵattyq halyqaralyq «TOM: Almaty» meikatony óz máresine jetti, dep habarlaidy Dala News.
Aýqymdy áleýmettik-injenerlik joba injenerlerdi, IT-mamandardy, dizainerlerdi, eriktilerdi jáne erekshe qajettiligi bar azamattardy bir maqsatqa toǵystyryp, qoǵam igiligine baǵyttalǵan tehnologiialyq sheshimderdi birlesip ázirleýge múmkindik berdi.
Úsh táýlik boiy qatysýshylar erekshe qajettiligi bar jandardyń kúndelikti ómirin jeńildetýge arnalǵan jobalardy jasap, olardy tájiribeden ótkizip, naqty qoldanysqa beiimdeý baǵytynda jumys júrgizdi. Meikaton aiasynda usynylǵan bastamalar inkliýzivti qoǵam qalyptastyrýdyń mańyzdy qadamyna ainalyp, tehnologiianyń adam ómirin jaqsartýdaǵy rólin aiqyn kórsetti.
Búginde Qazaqstanda erekshe qajettiligi bar azamattardyń ómir sapasyn arttyrýǵa, olardyń qoǵam ómirine belsendi aralasýyna jáne zamanaýi tehnologiialar arqyly jańa múmkindikterge qol jetkizýine erekshe nazar aýdarylyp keledi. Osy turǵyda «TOM: Almaty» meikatony áleýmettik jaýapkershilik pen innovatsiiany ushtastyrǵan mańyzdy alań boldy.
Joba tek injenerlik ideialardyń baiqaýy ǵana emes, meiirim men janashyrlyqtyń, qoǵamdaǵy ózara qoldaý mádenietiniń kórinisine ainaldy. Mundai bastamalar jastardyń áleýmettik máselelerge beijai qaramaityn, qoǵam igiligi úshin qyzmet etetin jańa býyn retinde qalyptasýyna yqpal etedi. Sonymen qatar, bul erekshe balalardyń ata-analary úshin de úlken úmit pen qoldaý alańy boldy. Sebebi usynylǵan jobalardyń basym bóligi balalardyń kúndelikti ómirin jeńildetýge, olardyń qozǵalys belsendiligin arttyrýǵa jáne qoǵamǵa erkin beiimdelýine baǵyttalǵan.
Meikatonnyń ashylýynda sóz sóilegen Sátbaev ýniversitetiniń rektory Meiram Begentaevjobanyń qoǵam úshin mańyzdylyǵyna erekshe toqtaldy:
«Bul meikaton adamdardy jaqyndastyratyn, júrekterdi biriktiretin erekshe joba. Osynda jinalǵan jastardyń energiiasy men izdenisi kez kelgen kedergini eńserýge bolatynyn dáleldeidi. Eń bastysy munda tehnologiia ǵana emes, adam taǵdyryna degen janashyrlyq bar. Biz jyl saiyn inkliýzivti qoǵam qurý jolynda tyń ideialardyń dúniege kelip jatqanyn kórip kelemiz. Osyndai jobalar arqyly jastar tek kásibi tájiribe jinap qana qoimai, qoǵamǵa paida ákelýdiń shynaiy mánin túsinedi. Bul bolashaqqa jasalǵan úlken qadam. Búgin usynylǵan jobalardyń árqaisysynda úmit, qamqorlyq jáne úlken eńbek jatyr. Osyndai bastamalardyń arqasynda elimizde inkliýzivti mádeniet nyǵaiyp, erekshe qajettiligi bar jandarǵa degen qoldaý arta túsetinine senimdimin».
Meikaton filosofiiasyna «Áleýmettik tehnologiialardy damytý qaýymdastyǵy» qoǵamdyq birlestiginiń vitse-prezidenti, jobanyń negizin qalaýshy Saniia Arapova da toqtaldy:
«Bul bastama qazaq halqyna tán ózara kómek pen janashyrlyq qundylyqtaryn jańǵyrtady. Bir-birine qoldaý kórsetý bizdiń qoǵamnyń eń asyl qasietteriniń biri. Osy yntymaq pen ortaq maqsat sizderge shabyt bersin».
Meikaton qorytyndysy jáne úzdik jobalar
Sarapshylar alqasy usynylǵan jobalardyń praktikalyq mańyzyn, qaýipsizdigin, qoljetimdiligin jáne tehnologiialyq sapasyn baǵalady. 72 saǵattyq marafon qorytyndysy boiynsha júldeli oryndar tómendegidei bólindi:
1-oryn «All-Fusion» komandasy («AdaptiCycle» jobasy). Komanda tserebraldy sal aýrýyna shaldyqqan jáne qimyl-qozǵalys úilesimi buzylǵan jastarǵa arnalǵan jeńildetilgen úsh dóńgelekti elektrli reabilitatsiialyq traik ázirledi. Jobanyń ereksheligi gibridti jetek júiesi, anatomiialyq tiregi bar oryndyq jáne 3D-baspa tehnologiiasy arqyly jasalǵan jeńil modýldi rama.
2-oryn «U Freedom» komandasy. Komanda tserebraldy sal aýrýynyń aýyr túrine shaldyqqan balalarǵa arnalǵan serýen arbasyn jetildirip, ony balanyń jeke qajettiligine beiimdedi. Prototip kúsheitilgen rama, qaýipsizdik beldikteri jáne arnaiy anatomiialyq tirektermen jabdyqtalǵan.
3-oryn «Neiskýsstvennye intellekty» komandasy. Komanda inkliýzivti tehnologiialar salasyndaǵy tiimdi injenerlik sheshim beiimdeý men ońaltýǵa arnalǵan assistivti qurylǵyny tanystyrdy.
4-oryn - úsh komandaǵa berildi:
• «Useful HDU Team» - tserebraldy sal aýrýyna shaldyqqan balalar men eresekterge arnalǵan úi jaǵdaiyndaǵy reabilitatsiialyq velotrenajer ázirledi. Qurylǵy arnaiy qosymshamen sinhrondalyp, jattyǵýdy oiyn formatynda ótkizýge múmkindik beredi.
• «MechanicsX» - vertikalizatordy, aiaq pen qoldy jattyqtyrý qurylǵylaryn bir júiege biriktirgen kópfýnktsionaldy reabilitatsiialyq apparat usyndy.
• «KSA Alt» - tserebraldy sal aýrýyna shaldyqqan balalardyń saýsaq motorikasyn damytýǵa arnalǵan arnaiy jattyqtyrǵysh jasady.
Sátbaev ýniversitetiniń arnaiy júldesi «Fiksiki» komandasyna «FixiDrive» jobasy úshin tabystaldy. Komanda múmkindigi shekteýli jandarǵa arnalǵan arbaǵa beiimdelgen intellektýaldy elektrjetek júiesin ázirledi. Joba paidalanýshynyń eriksiz qimyldaryn tegistep, qaýipsiz qozǵalysty qamtamasyz etýge baǵyttalǵan.
Aita ketý kerek, «TOM: Almaty» aiasynda ázirlengen barlyq jobalar aldaǵy ýaqytta jetildirilip, naqty paidalanýshylarǵa usynylady. Keibir prototipterdi shaǵyn seriialy óndiriske engizý múmkindigi de qarastyrylýda. Bul Qazaqstanda otandyq inkliýzivti tehnologiialardy damytýǵa jáne erekshe qajettiligi bar azamattardyń ómir sapasyn jaqsartýǵa baǵyttalǵan mańyzdy bastamalardyń biri.
Osyndai jobalar qoǵamda inkliýzivti mádenietti nyǵaityp qana qoimai, árbir balaǵa teń múmkindik berýge umtylatyn izgi qundylyqtardyń arta túskenin kórsetedi.
