Qoǵamda tanymal ánshi Abai Begeidiń kámeletke tolmaǵan qyzy turmysqa shyqqany qyzý talqyǵa túsip jatyr. Jaqyndary qyzdyń jasy endi 17-ge tolatynyn aitqan. Máselege QMDB ókilderi pikir bildirdi, - dep habarlaidy Dalanews.kz
Jýyrda ánshiniń 16 jastaǵy Symbat esimdi qyzy «neke qiǵan kúnimizden estelik» dep sýret jariialaǵan. Artynsha ony óshirgen.
QMDB baspasóz hatshysy Aǵabek Qonarbaiuly «Abai Begeidiń kámeletke tolmaǵan qyzynyń nekesin imam qimaǵan. Neke qiiý rásimi meshitte ótpegen. Jastar meshit aýlasynda estelikke sýretke túsken», — dedi.
Kámeletke tolmaǵan qyzdyń nekesine qatysty QMDB-nyń Mańǵystaý oblysy boiynsha ókildigi de málimdeme jasady.
«Neke qiiý rásimi meshitte bolmaǵany anyqtaldy. Meshit imamdary kámelet jasqa tolmaǵan qyzdyń nekesin qimaǵan. Meshitke kelip, qulshylyq úiin aralaýǵa, aýlasynda sýretke túsýge shekteý qoiylmaidy. Jastardyń meshitke kelip, estelikke sýretke túskeni belgili boldy. Qazaqstan musylmandary dini basqarmasynyń qabyldaǵan «Meshit imamdarynyń neke qiiý tártibi» qujatyna sáikes otbasy qurǵysy keletin azamattar áýeli AHAT bólimi arqyly zańdy nekege otyrýy tiis. Nike qiiý rásimine bolashaq erli-zaiyptylardyń ata-anasy nemese olardyń zańdy ókilderi qatysýy mindetti. Dini nekege ata-analarynyń nemese zańdy ókilderiniń kelisimi kerek. Olai bolmaǵan jaǵdaida meshitte dini neke qiylmaidy», — dep jazylǵan QMDB-nyń Mańǵystaý oblysy boiynsha ókildigi málimdemesinde.
