Qyzylorda oblysynyń prokýratýrasy búdjet qarajatyn jymqyrý faktisin anyqtady, dep habarlaıdy Dalanews.kz.

Atap aıtqanda, «Qazsýshar» RMK oblystyq fılıalyn tekserý barysynda 13 myń tonna qıyrshyq tas jetkizilmegeni belgili boldy.

Bul rette qarajat jalpy jetkizý kólemine tolyq aýdarylǵan (60 myń tonna).

Tabıǵı materıal – Kókaral bógetiniń strategıalyq nysanyn nyǵaıtý úshin óte qajet ekenin aıta ketý kerek.

Zańsyz áreketterdiń saldarynan memleketke 188 mln teńgeden astam shyǵyn kelgen.

Atalǵan fakti boıynsha oblys prokýratýrasymen Qylmystyq kodekstiń 189-baby 4-bóliginiń 2) tarmaǵynda kózdelgen qylmystyq quqyq buzýshylyq belgileri boıynsha sotqa deıingi tergep-tekserý júrgizildi (laýazymdy adam óziniń qyzmet babyn paıdalana otyryp, ózine senip tapsyrylǵan bóten múlikti ıemdenip alý nemese talan-tarajǵa salý, ıaǵnı jymqyrý, asa iri mólsherde jasaǵan).

Sottyń sanksıasymen «Qazsýshar» RMK fılıalynyń bes laýazymdy tulǵasy men bas merdiger qamaýǵa alyndy.

Qylmystyq isti oblystyń arnaıy prokýrorlary tergedi.

Qazirgi tańda, ol boıynsha is aıaqtalyp, sotqa jiberildi.