Ákimniń sózine qaraǵanda, 2004 jyldan beri Qyzylordada jeke turǵyn-úı qurylysy úshin jer telimderi berilgen joq. Qazirgi kezde kezekte 49 myń 212 adam tur. 2013 jyly osy másele zerdelenip, Qyzylorda-Jezqazǵan avtojolynyń boıynda jeke úı qurylysyna arnalǵan 980 gektar jer belgilendi. Sol jyly geologıasy tekserilip, kelesi jyly 234 mln.-ǵa jobalyq-smetalyq qujattar ázirlendi. 2015 jyly oblys basshylyǵy Úkimette, ulttyq ekonomıka jáne qarjy mınıstrlikterinde búdjettik ótinimderimdi qorǵap shyqty. Osynyń arqasynda bıylǵy jylǵa 9,9 mlrd. teńge bólý týraly sheshim shyǵaryldy.
«Jaqynda konkýrsy ótti. Osynyń aıasynda jańaǵy 980 gektar jerge 75 shaqyrym jol, 353 shaqyrym aýyz sý jelisi, 102 shaqyrym gaz qubyry, 150 elektr jelisi jáne bir dana transformator 1-jeltoqsanǵa deıin salynyp bitedi. Qudaı qalasa, kelesi dúısenbi, shildeniń 4-i kúni Qyzylorda qalasynyń 6600 azamatyna jer telimderin tabystalady. Jańa móltek aýdanynda. 36 myń halyq turatyn jańa móltek aýdany paıda bolady. Bul óte jaqsy jetistik dep oılaımyn», – dep atap kórsetti Q.Kósherbaev.
