Qyzylorda oblysynda 9-synyp oqýshysynyń keýde tusynan uryp óltirgen 10-synyp oqýshysyna qatysty sot otyrysy ótti, dep habarlaıdy Dalanews.kz.

Qazir joǵary synyptyń eki oqýshysy sotqa tartyldy. Olarǵa Qylmystyq kodeks boıynsha “Densaýlyqqa qasaqana aýyr zıan keltirý” jáne “Buzaqylyq” degen aıyp taǵyldy.

Shıeli aýdany Qodamanov aýylynyń 10-synyp oqýshylary 9-synyp oqýshylaryn syılastyq tanytpady degen syltaýmen jazalamaq bolǵan. Sottalýshylardyń biri tizilip turǵan ózinen kishi balalardyń betinen urǵan.

“Sottalýshy K jábirlenýshiniń keýde tusynan judyryǵymen qatty urǵan. Jábirlenýshiniń júregi reflektorly toqtap, saldarynan aýyr dene jaraqatynan mert boldy", – delingen sotta.

Sot sheshimimen kámeletke tolmaǵan qaskóı 6 jyl 8 aıǵa bas bostandyǵynan aıyryldy. Al buzaqylyq jasaǵany úshin eki sottalýshy da taraptardyń tatýlasýyna baılanysty jazadan qutylyp ketti.

Úkim zańdy kúshine engen joq.