Astanada ótip jatqan óńirlik merzimdi basylymdardyń alǵashqy forýmyna elimizdiń ár óńirinen 200-den astam delegat qatysyp jatyr. Sonyń aiasynda túrli sessiialar, master-klasstar, taǵylymdy talqylar uiymdastyrylýda.
– Aimaqtaǵy basylymdardy qarjylandyrý tetigi men erejelerin qaita qarastyryp jatyrmyz. BAQ-qa beriletin memlekettik tapsyrystyń talaptaryn jeńildetýge múddelimiz. Atap aitqanda, jergilikti BAQ-ty qoldaý tarifteri 2019 jyldan beri ózgermegeni belgili. Soǵan bailanysty biz tarifterdi ulǵaitýdy josparlap otyrmyz. Bul sharalar jobalyq tásilde óńirlik memlekettik aqparattyq tapsyrysty qalyptastyrýǵa múmkindik beredi. Sondai-aq, jergilikti BAQ-qa jańa serpin berip, oń áser etedi degen úmittemiz, – dedi Aqparat jáne qoǵamdyq damý ministri Darhan Qydyráli.
Ministr óńirlik merzimdi basylymdardyń jaǵdaiyna naqty ǵylymi zertteý jasalý kerektigin aitty.
Sonymen qatar, Darhan Qýandyquly gazet basý, taratý isinde, aýdandyq basylymdaryn jańa mediaǵa beiimdeýde Qyzylorda oblysyndaǵy “Syr media” seriktestigi júieli jumys atqaryp otyrǵanyn atap ótti.
«Syr media» JShS bas direktory Amanjol Ońǵarbaevtyń aitýynsha, jastar gazet oqýdan, rýhaniiattan alshaqtap bara jatqan zamanda Qyzylorda oblysynyń ákimi Nurlybek Nálibaev tyń bastamany qolǵa almaq. Iaǵni, 5 myń stýdenttiń merzimdi basylymdarǵa jazylýyna respýblikada alǵash bolyp sýbsidiia bólýdi qarastyryp jatyr.
– Muny jastarǵa jasaǵan janashyrlyǵy ári eldik múddeni tý etken merzimdi basylymdarǵa kórsetken qoldaýy dep túsiný kerek. Qazirgi tańda Syr óńirindegi joǵary oqý oryndarynda 15 myńnan astam stýdent, kolledjderde 20 myńnyń ústinde stýdent oqidy. Solardyń arasynan yqylas tanytqan jastarǵa tegin gazetke jazyp berý múmkindigi qarastyrylatyn bolady, – dedi Amanjol Saqypuly.
