Aqtóbe oblysynyń Muǵaljar aýdanynda aýyl ákimine qatysty bastalǵan is qoǵamda qyzý pikir týdyrdy. 13 mamyr kúni Aqtóbe qalalyq sotynda Qudaibergen Jubanov atyndaǵy aýyldyq okrýgtiń ákimi Lázzat Berdibaeva ákimshilik jaýapkershilikke tartyldy. Oǵan ata-analyq mindetterin oryndamady degen aiyp taǵyldy, dep habarlaidy Dalanews.kz "Moi Gorod" basylymyna silteme jasap.
Berdibaeva tabiǵat aiasyndaǵy demalys kezinde gúldi onyń 6 jáne 8 jastaǵy qyzdary úzgenin aitty. Ákim sol sátte dastarhan jaiyp jatqanyn, keiin olarmen sýretke túsip, ony WhatsApp statýsy retinde jariialaǵanyn túsindirdi. Sýret jelige taralǵan soń, qoǵam tarapynan synǵa ushyrap, is sotqa deiin jetken.
Politsiia jasaǵan hattamada Berdibaeva balalarǵa gúldiń Qyzyl kitapqa engenin eskertpedi dep kórsetilgen. Biraq ákim kerisinshe, bul jaiynda qyzdaryna túsinik bergenin aitty. Sonymen qatar ol otbasy tabiǵatta 21 emes, 19 sáýir kúni bolǵanyn dáleldep baqty.
Sotta belgili bolǵandai, gúldiń naqty túrine bailanysty saraptama jasalmaǵan. Iaǵni onyń sirek kezdesetin nemese joiylyp bara jatqan ósimdikter tizimine kiretini týraly ǵylymi qorytyndy joq. Orman sharýashylyǵy jáne janýarlar dúniesi komitetiniń ókili Artýr Kantarbaev bul zertteý tek ǵylymi mekemelerdiń quzyrynda ekenin aitty. Onyń sózinshe, Múgaljar óńirindegi qyzǵaldaq túrleri naqty anyqtalmaǵan.
Berdibaeva sotta 18 jyldan beri memlekettik qyzmette eńbek etip kele jatqanyn, zań buzbaǵanyn, al áleýmettik jelidegi syn-pikirler psihologiialyq qysym kórsetkenin jáne onyń densaýlyǵyna áser etkenin jetkizdi. Sonymen qatar aýyl turǵyndary men aqsaqaldar keńesiniń oń pikir jazylǵan hattaryn sotqa usyndy.
Barlyq ýájderdi tyńdaǵannan keiin sýdia isti qaraýdy 15 mamyrǵa qaldyrdy.
