Aqtóbe oblysynda qyzǵaldaq ustap sýretke túsken ákimge qandai shara qoldanylǵany belgili boldy, - dep habarlaidy Dalanews.kz.
Muǵaljar aýdanynda aýyl ákimine qatysty ákimshilik hattama toltyryldy.
Sheneýniktiń gúl ustaǵan sýreti áleýmettik jelide jariialanǵannan keiin politsiia tekseris júrgizip, ákimge qatysty ákimshilik hattama toltyrǵan.
"QR ÁQBtK 127-baby boiynsha ("Kámeletke tolmaǵan balany tárbieleý men qamqorlyq jasaý mindetterin oryndamaý") ákimshilik hattama toltyryldy, sebebi onyń aitýynsha, gúlderdi kámeletke tolmaǵan balalary terip alǵan. Sonymen qatar, memlekettik qyzmetshilerdiń etikasy jónindegi keńeste qaraý úshin aýdan ákimdigine usynys joldandy", – dedi Aqtóbe oblysy PD baspasóz qyzmeti ókili.
Eske salaiyq, buǵan deiin Aqtóbe oblysynda jergilikti shendilerdiń biriniń basy daýǵa qalǵany habarlandy.
Mán-jai
Jergilikti Instagram paraqshalardyń birinde aqtóbelik shendilerdiń biri qyzǵaldaq julǵany týraly aqparat tarady.
"Zań boiynsha tyiym salynǵan emes pe? Aýdan ákimi. Shara qabyldaýlaryńyzdy suraimyz", - dep jazylǵan aqparatta.
Aqtóbe oblysynyń Politsiia departamenti jaǵdaiǵa pikir bildirgen.
"Bul aqparat tekserilip, quqyqtyq baǵa beriledi", - dedi politsiia.
Ákimniń pikiri
Orda.kz málimetinshe, sýrettegi sheneýnik - Aqtóbe oblysynda Q.Jubanov atyndaǵy aýyldyq okrýg ákimi Lázzat Berdibaeva.
Endi Muǵaljar aýdany Q.Jubanov atyndaǵy aýyldyq okrýginiń ákimi Lázzat Berdibaevanyń qandai qyzǵaldaq julǵanyn politsiia teksermek.
Basylym deregine súiensek, shendi "julýǵa bolmaitynyn bilmedim" dep aqtalǵan.
"Kúni keshe túsken sýret. Demalysta balalarmen dalaǵa serýenge shyqtyq. Qandyaǵashqa qarai Jurynnyń qasynda tasjoldyń boiynda boldyq. Balalarym julyp ákep berdi. Estelikke sýretke tústim. WhatsApp statýsyna saldym. Gúldi tanymaidy ekenmin. Men ony julýǵa bolmaitynyn bilgen joqpyn. Basqa jaqta Qyzyl kitapqa engen gúldi julýǵa bolmaitynyn bilemin. Eldiń bári julyp jatty. Oiymda eshteńe joq. Áitpese, mine, men juldym, mine, sýretke tústim dep nem bar", - degen Lázzat Berdibaeva.
Buǵan deiingi oqiǵa
Eske salaiyq, buǵan deiin áleýmettik jelilerde Qyzyl kitapqa engen qyzǵaldaqtardy kesip, kóligine tiep jatqan áieldiń videosy taraǵan bolatyn. Keiin politsiia departamenti Túrkistan oblysy Ordabasy aýdanyndaǵy tabiǵi alqapta sirek kezdesetin, joiylyp ketý qaýpi bar qyzǵaldaqtardy zańsyz tergen Shymkent turǵyny anyqtalǵanyn málimdedi.
Aita keteiik, bul áreket QR Qylmystyq kodeksiniń 339-baby sirek kezdesetin jáne joiylý qaýpi tóngen ósimdikterdi zańsyz joiý deregi boiynsha saralanady.
