26-27 qańtar kúnderi Qyzylorda oblysynyń ákimi Qyrymbek Kósherbaev bastaǵan delegatsiia shekaralas óńirlermen yntymaqtastyq bailanys máselelerin talqylaý maqsatynda jumys saparymen Ózbekstan Respýblikasynda boldy.
Jumys sapary Ózbekstan Respýblikasynyń tuńǵysh Prezidenti Islam Karimovtyń Samarqand qalasyndaǵy Shahi Zinda kesenesindegi beiitine gúl shoqtaryn qoiýdan, sondai-aq dańqty qolbasshy, jerlesimiz - Jalańtós Bahadúrdiń kesenesine táý etýden bastaldy. Delegattar birqatar kásiporyndardy aralap, kásipkerlermen jáne jergilikti kompaniia basshylarymen kelissózder júrgizdi.
Osydan soń Qyrymbek Kósherbaev Samarqand oblysynyń ákimi Himmat Okbýtaevpen kezdesti. Kezdesý barysynda taraptar Qyzylorda jáne Samarqand oblystarynyń arasyndaǵy óndiristik jáne saýda-ekonomikalyq yntymaqtastyqtyń perspektivalaryn talqylady.
Al, Naýai oblysyna sapar baǵdarlamasy Nuratadaǵy Áiteke bi memorialdyq keshenine barýdan bastaldy. Onda qazaq mádeni ortalyǵynyń belsendilerimen kezdesý ótti.
Jumys sapary qyzylordalyq kásipkerler men Naýai oblysy isker toptarynyń qatysýymen ótken biznes-forýmmen jalǵasty. Ózbekstan tarapy qonaqtarǵa 2008 jyly qurylǵan «Naýai» erkin indýstrialdy-ekonomikalyq aimaǵynyń múmkindikterin tanystyrdy. «Naýai» erkin indýstrialdy-ekonomikalyq aimaǵynda salyqtyq, valiýtalyq jáne kedendik preferentsiialardy qamtityn erekshe quqyqtyq rejim jumys isteidi. Sonymen qatar aýmaqqa kólikpen kelip ketý, Ózbekstan Respýblikasynyń turǵylyqty emes azamattary úshin eńbek etýge ruqsat berýdiń jeńildetilgen tártibi qarastyrylǵan. Budan bólek, «Naýai» erkin indýstrialdy-ekonomikalyq aimaǵyndaǵy kásiporyndar joǵary deńgeili infraqurylymmen qamtamasyz etiledi.
Qyrymbek Kósherbaev pen Naýai oblysynyń ákimi Kabýl Týrsýnov ónerkásip jáne aýyl sharýashylyǵy ónimderin qaita óńdeý salalaryndaǵy ekijaqty yntymaqtastyqtyń perspektivalaryn talqylady.
27 qańtar kúni delegattar Tashkent qalasyndaǵy Tóle bi jáne Ámir Temir kesenelerine gúl shoqtaryn qoidy. Qyrymbek Kósherbaev Ózbekstan Respýblikasy Olii Májilisi Senaty tóraǵasynyń orynbasary Sodik Safoevpen, sondai-aq Tashkent qalasynyń ákimi Rahmonbek Ýsmanovpen, Ózbekstan astanasyndaǵy birqatar ónerkásiptik kásiporynnyń basshylarymen kezdesti. Biznes ókilderimen kezdesý barysynda Qyrymbek Kósherbaev búginde memleketimiz Nursultan Ábishuly Nazarbaevtyń bastamasymen sheteldik investorlarǵa jeńildikter preferentsiialaryn usynyp otyrǵandyǵyn atap ótti.
- Olar – kedendik baj salyǵynan bosatý, memlekettik granttar usyný, salyq jáne investitsiialyq sýbsidiia boiynsha jeńildikter berý. Al jergilikti bilik óz kezeginde óndiris oryndaryna jer telimderin bólý men qajetti infraqurylym júrgizýge kepildik beredi. Óz kezeginde biz agrónerkásip sektory, azyq-túlik, elektrotehnika, qurylys jáne avtomobil ónerkásibi salalary boiynsha Ózbekstan tájiribesine súiengimiz keledi,- dedi Qyrymbek Kósherbaev.
Sapar qorytyndysy boiynsha qol jetkizilgen kelissózderdiń júzege asyrylýyn qamtamasyz etetin birlesken aimaqaralyq jumys toptary quryldy.
