Qyzdarymnyń tátti airan ishetin ádeti bar edi. Buryn 400 teńgeniń ainalasynda turatyn. Qazir 680 teńgege kóterilip ketti. Óz elimizde shyǵatyn sút ónimderi nelikten qymbattap jatqanyn túsine almadym.
Petropavldan shyǵatyn sút te sharyqtap barady. Dollardyń kóterilýi men sanktsiia áser etpeitin kásiporyndar qulqynnyń qamyn oilaityn siiaqty... Al olardy baqylap, baǵany turaqtandyratyn QR Aýyl sharýashylyǵy ministrligi ne qarap otyrǵanyn bir Qudai biler?!
Múmkin Ýkrainadaǵy soǵys pen aldaǵy saiasi naýqandy ýaiymdaǵan siyrlar sút bermei qalǵan shyǵar?
Máminniń zamanynda da qolynan is kelmeitinin kórsetken eski de jańa úkimet otstavkaǵa ketýi tiis. Ótkendegi qymbatshylyqqa dollar áser etti dep edi. Endi ne syltaý aitar eken?
Esi durys elder ǵaryshqa umtylyp jatqanda bizdiń sýpermarkette qantqa talasyp qyrylyp jatqanymyzdyń ózi uiat.
Bio kefir degen tátti airan Qyrǵyzstanda shyǵady. Mailylyǵy az, dámi jaqsy. Baǵasy 510 teńge turady. Almatyǵa 200 shaqyrym jerdegi Bishkekten tasymaldanady.
Al 50 shaqyrymdaǵy Esik qalasynan shyǵatyn Fýdmasterdiń airany 680 teńgeden satylýda. Álemdegi geosaiasi jaǵdai, dollar degender Qyrǵyzdarǵa da áser etip jatqan shyǵar? Biraq baǵalaryn qymbattatpai ustap tur.
Al bizdiń qomaǵailar tasymalǵa shyǵyn shyqpasa da airannyń baǵasyn aspandatyp jibergen. Sondyqtan syrttan keletin poroshok, karton qaǵazy qymbat degen tek syltaý siiaqty. Bar gáp kásipkerlerdiń ashkózdigi men QR Aýyl sharýashylyǵy ministrliginiń qaýqarsyzdyǵynda...
