Qyrǵyzstan prezidenti Almazbek Atambaev bastaǵan úkimet músheleri men sáýir tóńkerisi kezinde qaza tapqandardyń týystary, sol oqiǵanyń batyrlary «Ata-Beiit» memorialdyq keshenindegi eskertkishke gúl shoqtaryn qoiyp, duǵa baǵyshtady.
Qyrǵyzstannyń burynǵy prezidenti Qurmanbek Bakiev 2010 jyly 7 sáýirde narazylyq sharasyna shyqqan adamdardy atýǵa buiryq berdi. Tártipsizdikter kezinde 100-ge jýyq adam qaza taýyp, 300-den astam adam jaralandy. Qandy oqiǵa týraly sot áli jalǵasýda.
Prezident Almazbek Atambaev halyqtyq Sáýir revoliýtsiiasynyń kezekti jyldyǵyna orai málimdeme jasady. Memleket basshysy Qyrǵyzstan tarihyndaǵy 2002 jylǵy 17 naýryz, 2005 jyldyń 24 naýryzy jáne 2010 jylǵy 7 sáýir sekildi mańyzdy kúnderdiń ózara bailanysyn atap ótti. Onyń sózinshe, bul úsh data Qyrǵyzstan halqynyń erkindik, demokratiia jáne ádildikke umylǵan qiyn da erlikke toly jolyndaǵy asýlar bop tabylady.
Almazbek Atambaev 7 sáýirdi 17 jáne 24 naýryz sekldi ózge tarihi kúnderge qarama-qarsy qoiǵysy keletinderdi synǵa aldy.
«Bulai deýshiler is júzinde arandatýshylar bop tabylady. Olar eldi soltústik jáne ońtústikke bólgisi, halyqty birliginen ajyratqysy jáne memlekettiń damýyn tejegisi keledi. Halyqta «It úredi, kerýen kóshedi» degen sóz bar. Bul tóbetter qansha úrse de, qyrǵyzdyń kóshi óz jolymen júre beredi. Halyq kúreste tapqan jolymen jarqyn bolashaqqa qadam basady.», - dedi ol.
