Ál-Farabi atyndaǵy Qazaq ulttyq ýniversitetiniń Basqarma Tóraǵasy – Rektory Janseiit Túimebaev Ońtústik Koreiadaǵy Hende aýrýhanasynyń bas direktory Kim Bý Soppen kezdesti, – dep habarlaidy Dalanews.kz.
Kezdesýde ýniversitet rektory qurmetti qonaqqa QazUÝ-dyń jetken jetistikteri men aldaǵy josparlary týraly aityp, yntymaqtastyqty arttyrýǵa baǵyttalǵan usynystaryn jetkizdi.
– Qazirgi tańda QazUÝ men Ońtústik Koreia JOO-lary arasyndaǵy seriktestik qarqyndy damyp kele jatyr. Biz bailanysty odan ári damytýǵa múddelimiz. Búginde Memleket basshysy Qasym-Jomart Toqaevtyń qoldaýymen QazUÝ qalashyǵy qurylysynyń II kezeńi júzege asýda. Jospar boiynsha qalashyqta emhana salynady.
Meditsinalyq ortalyqta poliklinika, meditsina jáne densaýlyq saqtaý fakýlteti ornalasady. Osy turǵyda atalǵan ǵimaratta Hende aýrýhanasymen birlesip meditsinalyq ortalyq ashýdy usynamyn, – dedi rektor.
Óz kezeginde qurmetti qonaq jyly qabyldaǵany úshin ýniversitet rektoryna rizashylyǵyn bildirdi. Óz sózinde Kim Bý Sop atalǵan bastamalardy qoldaitynyn aityp, birqatar usynysyn ortaǵa saldy.
– Ońtústik Koreia meditsina salasy boiynsha álemde úzdik úshtikke kiredi. Qazirgi tańda memleketimiz meditsinany odan ári damytý úshin aianbai eńbek etýde. Hende aýrýhanasynda bilikti professorlar men ǵalymdar jumys isteidi. Bizdiń maqsat – Ońtústik Koreiadaǵy Top-10 aýrýhananyń qataryna qosylý. Biz QazUÝ-men qarym-qatynasty damytýǵa árqashan daiynbyz. Bolashaqta birlesip ǵylymi konferentsiialar, simpoziýmdar, kezdesýler ótkizý qajet dep sanaimyn, – dedi Kim Bý Sop.
Júzdesýde QazUÝ basshysy Janseiit Túimebaev pen Hende aýrýhanasynyń bas direktory Kim Bý Sop meditsina baǵyty boiynsha ózara túsinik týraly memorandýmǵa qol qoidy.
Taraptar kezdesýde atalǵan bastamalardy josparly túrde iske asyrýǵa ýaǵdalasyp, estelik syilyqtarmen almasty.
