Tegin medısınalyq qabyldaý Kannam Severans klınıkasynda qoldanylatyn tártippen júzege asty. Koreı elinen kelgen áriptester tıimdi medısınalyq qyzmet kórsetý úshin QazUÝ-dyń medısınalyq ortalyǵynda ornatylǵan ÝZI-apparatty, stomatologıalyq qondyrǵylar men basqa da qural-jabdyqtardy paıdalandy. Sonymen qatar koreı dárigerleri ózderimen birge fızıoterapıalyq qurylǵylardy, ekspress-zerthana men kóp kólemde dári-dármekter ala kelgen.
Ońtústik Koreıadan kelgen mamandar: otbasy dárigeri, torakaldy hırýrg, gastroenterolog jáne reabılıtolog tegin medısınalyq keńes alýǵa nıet tanytqan barlyq azamattarǵa kásibı keńesin berdi.
QazUÝ-dyń medısınalyq ortalyǵynda ótken eki kúndik tekserilýge Qazaqstan azamattarynan bólek, qazaq jerinde ýaqytsha turaqtaǵan Ońtústik Koreıa eliniń azamattary da qatysty.
Barlyq kelýshiler ózderiniń densaýlyq jaǵdaıyna qatysty suraqtary bolǵan saýalnamasyn toltyrdy. Emdelýshiler ekspress-zerthanada tekseristen ótip qana qoımaı, túrli rentgenologıalyq jáne últradybystyq zertteý qyzmetterin tegin paıdalaný múmkindigine ıe boldy.
Kelýshilerdiń deni profesor kardıolog Iýn Óng Vonnyń keńesterine júgindi. QazUÝ-dyń medısınalyq ortalyǵy barlyq emdelýshilerge tegin elektrokardıografıa jasady.
Koreılik áriptester emdelýshilerde aýrý anyqtalǵan jaǵdaıda qoldanylatyn barlyq kerek-jaraqtar: jaqpa maılar, medısınalyq jabystyrǵyshtarmen tolyq qamtamasyz etildi. Sonymen qatar kishkentaı qaralýshylarǵa dárýmendi muz kámpıtter úlestirildi.
Ál-Farabı atyndaǵy QazUÝ Shyǵystaný fakúlteti Qıyr Shyǵys jáne Ońtústik Azıa kafedrasy Koreıtaný bólimi meńgerýshisi, profesor Lı Bóng Djonyń basshylyǵymen kelgen aýdarmashy stýdentterdiń tekserýdiń tıimdi ótýine zor septigin tıgizgenderin erekshe atap ótken jón.
Osylaısha, eki kúnde tegin medısınalyq kómek pen keńeske túrli baǵyttaǵy alty dárigerdiń medısınalyq qyzmetine 200-den asa emdelýshi júgindi.
QazUÝ Baspasóz qyzmeti
