Ál-Farabi atyndaǵy Qazaq ulttyq ýniversiteti men Qytai Halyq Respýblikasynyń Soltústik-Batys politehnikalyq ýniversiteti mikrospýtnik arqyly ǵylymi zertteýler júrgizý boiynsha kelisimge qol qoidy.
Atalǵan kelisimge Memleket basshysy Qasym-Jomart Toqaev pen Qazaqstanǵa resmi saparmen kelgen QHR Tóraǵasy Si Tszinpinniń birlesken málimdemesinde qol jetkizildi.
Bul bastamany Ál-Farabi atyndaǵy QazUÝ qazaqstandyq joǵary oqý oryndary arasynda tuńǵysh ret júzege asyryp otyr.
Ortaq jumys óz kezeginde ǵaryshty zertteýge, bilikti mamandardy daiarlaýǵa jáne ortaq spýtnikterdi ázirleýge jol ashady. Sonymen qatar mikrospýtnik arqyly jerdi qashyqtyqtan zertteý jumystaryn júrgizýge mol múmkindik beredi.
Qytaidyń Soltústik-Batys politehnikalyq ýniversiteti ǵaryshqa nanospýtnikterdi ushyrý boiynsha kóshbasshy bolyp tabylady.
Jobanyń maqsaty – jer qyrtysy men mantiiadaǵy tyǵyzdyq geterogendiligin anyqtaý úshin spýtniktiń arnaiy jer stantsiiasy men taratqyshty qamtityn gravimetriialyq ólsheý jabdyqtaryn ázirleý. Bul jumys úlken tereńdiktegi geodinamikalyq protsesterdi zertteýdiń negizgi mindetterin sheshýge arnalǵan.
Sonymen qatar qos ýniversitet birlesip júzege asyrǵan mikrospýtnikti Shanhai yntymaqtastyq uiymy jariialaǵan Ekologiia jyly aiasynda jáne qara shańyraq QazUÝ-dyń 90 jyldyǵy qarsańynda ǵaryshqa ushyrý josparlanýda.
Aita keteiik, Ál-Farabi atyndaǵy QazUÝ ǵaryshqa nanospýtnikterdi ushyrý boiynsha tájiribesi bar elimizdiń jalǵyz joǵary oqý orny. Búginge deiin oqý ordasy ǵarysh ailaǵyna «Al-Farabi-1» jáne «Al-Farabi-2» nanospýtnigin ushyrǵan bolatyn.
Ál-Farabi atyndaǵy QazUÝ-dyń Baspasóz qyzmeti
