Ál-Farabi atyndaǵy Qazaq ulttyq ýniversitetine Qytai Halyq Respýblikasy memlekettik keńesi premeriniń orynbasary Liý Gochjýn jumys saparymen keldi.
Sapar aiasynda QazUÝ-da «5G/5.5G kommýnikatsiialyq tehnologiialar» zerthanasynyń saltanatty ashylý rásimi ótti. Bul ortalyq Qazaqstanda telekommýnikatsiia salasyndaǵy jańa tehnologiialarǵa qol jetkizýge arnalǵan.
Zerthananyń ashylý rásimine QHR-dyń Qazaqstandaǵy tótenshe jáne ókiletti elshisi Chjan Siao, Ál-Farabi atyndaǵy QazUÝ-dyń Basqarma Tóraǵasy – Rektor Janseiit Túimebaev, QHR memlekettik keńesiniń keńse basshysynyń orynbasary Go Vei, QHR úkimetiniń Eýraziia isteri jónindegi arnaiy ókili Li Hýei, QHR aýyl sharýashylyǵy ministriniń orynbasary Chjan Sinvan, QHR kommertsiia ministriniń orynbasary Li Fei, oqý ordasynyń ǵalymdary men oqytýshy-professorlar quramy, stýdentter qatysty.
Jańa ǵylymi zerthana telekommýnikatsiialyq bailanys júieleriniń mamandaryn daiarlaýǵa, jańa tehnologiialardy meńgerip, internet jyldamdyǵyn jetildirýge, 6G jelisin engizýge múmkindik beredi.
Bolashaqta ortalyq zertteý jumystaryn baqylap qana qoimai, joǵary tehnologiialyq bailanys qurylǵylarynyń óndirisine, olardy qurastyrýǵa jáne iske qosýǵa da qatysa alatyn alańǵa ainalady.
Sharada QHR memlekettik keńesi premeriniń orynbasary Liý Gochjýn jańadan ashylǵan zerthana telekommýnikatsiia salasyna bilikti mamandardy daiarlaýǵa úlken septigin tigizetinin atap ótti.
«Bul zerthananyń QazUÝ bazasynda ashylýy Qazaqstan men Qytai tarapy úshin aitýly oqiǵa dep sanaimyn. Qazirgi tańda kommýnikatsiia salasy álem boiynsha qarqyndy damý ústinde. Bul jańasha ózgeristerden qalys qalýǵa bolmaidy. Sondyqtan atalǵan salada mamandardy daiarlaýǵa, internet jelisin damytýda osyndai ortalyqtardyń kóp bolýy mańyzdy», – dedi QHR memlekettik keńesiniń vitse-premeri Liý Gochjýn.
Ál-Farabi atyndaǵy QazUÝ-dyń Basqarma Tóraǵasy – Rektor Janseiit Túimebaev delegatsiia múshelerine ótken jyly QazUÝ-da ashylǵan Qytaidyń Soltústik-batys politehnikalyq ýniversitetiniń filialy týraly aqparat berip, qyzmetimen tanystyrdy.
«5G/5.5G kommýnikatsiialyq tehnologiialar» zerthanasy Qytaidyń Qazaqstanda tuńǵysh ashylǵan filialynda júzege asyp otyr. Qytai – elimiz úshin bizdiń senimdi seriktesterimizdiń biri. Osy turǵyda QazUÝ Qytai JOO-larymen ǵylym jáne joǵary bilim boiynsha tyǵyz qarym-qatynasta. Búgingi ashylǵan ǵylymi zerthana eki memlekettiń joǵary oqý oryndary úshin aldaǵy ýaqytta birlesip jumys isteýge jáne yntymaqtastyqty odan ári arttyrýǵa mol septigin tigizedi dep sanaimyn», – dedi rektor.
Ál-Farabi atyndaǵy QazUÝ men QHR Soltústik-batys politehnikalyq ýniversiteti birlesip ashqan zerthanaǵa Huawei kompaniiasy demeýshilik kórsetti. Zerthana QazUÝ bazasyndaǵy Soltústik-batys politehnikalyq ýniversitetiniń filialynda ornalasqan.
Sondai-aq QazUÝ-ǵa jumys sapary barysynda Qytai Halyq Respýblikasy memlekettik keńesi premeriniń orynbasary Liý Gochjýn Qytai – Qazaqstan birlesken qashyqtyqtan zondtaý tehnologiiasy jáne qoldaný zerthanasynyń jáne Dárilik ósimdikterdi ǵylymi-zertteý ortalyǵynyń jumysymen tanysyp, ǵalymdarmen áńgimelesti.
