Ál-Farabı atyndaǵy Qazaq ulttyq ýnıversıtetiniń Basqarma Tóraǵasy – Rektory Janseıit Túımebaev oqý ordasynyń oqytýshy-professorlar quramy men stýdent-jastarmen kóshbasshylyq kezdesý ótkizip,  QR Prezıdentiniń Joldaýyn talqylady.

 JOO basshysy júzdesýde Ádiletti Qazaqstandy qurýdaǵy jastardyń róline toqtalyp, Memleket basshysynyń bastamasymen elimizde oryn alyp jatqan eleýli ózgeristerge nazar aýdardy.

«Ádiletti Qazaqstandy bolashaq urpaqqa amanat etý – barshamyzǵa ortaq mindet» taqyrybyndaǵy sharaǵa fakúltet dekandary, aradager oqytýshylar, profesorlar, jas ǵalymdar, bilim alýshy jastar jáne 1 kýrs stýdentteri jınaldy.

Rektor óz sózinde Qasym-Jomart Toqaevtyń bıylǵy Qazaqstan halqyna Joldaýy eń aldymen el ekonomıkasyn jaqsartýǵa, halyqtyń ál-aýqatyn kóterýge, jastardyń tulǵalyq belsendiligin arttyrýǵa negizdelgen aýqymdy josparlardy qamtyǵanyn jetkizdi.

«Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýda ǵylym jáne joǵary bilimdi damytý, úzdik ýnıversıtetterdiń naqty sektormen baılanysyn nyǵaıtý máseleleri ortaǵa salyndy. Inovasıalyq saıasatty elimizdiń ǵylymı-tehnologıalyq basymdyqtarymen úılestirý, joǵary oqý oryndaryndaǵy qoldanbaly ǵylymnyń áleýetin arttyrý qarastyryldy. Ulttyq múddelerdiń myzǵymastyǵy, ult ómiriniń sapasyn arttyrý, qaýipsizdik pen zań ústemdigin qamtamasyz etýge de aıryqsha mańyz berildi. Bul tapsyrmalardyń biraz bóligin ýnıversıtet ómirinde iske asyryp jatyrmyz, aldaǵy ýaqytta da júıeli jalǵastyratyn bolamyz», – dedi rektor.

Oqý ordasynyń basshysy bolashaq Qazaqstandy damytý, ádiletti qoǵam qurýda jastarǵa artylar senim mol ekenin aıta kele, eń basty mindet  bilimdi jáne bilikti maman bolý ekenin atap ótti.

«Prezıdent óz sózinde: «Bizdiń uzaq merzimge arnalǵan damý jolymyz – aıqyn. Bıik maqsattarymyz bar. Oǵan jetý úshin, eń aldymen, el birligin saqtaı bilýimiz kerek. Bir-birimizge qoldaý bildirip, qurmet kórsetýimiz qajet», - dedi. Bul jalyndy jastardyń qolynan keletin dúnıe. El birligin, ózara tatýlyqty saqtaý – basty qaǵıdaǵa aınalýy kerek. «Prezıdent buǵan deıin de birneshe márte aıtty. «Táýelsizdik – eń qasıetti, qasterli qundylyǵymyz, eń basty baılyǵymyz». Osy baǵa jetpes qundylyǵymyzdyń qadirin bilip, qýatty Qazaqstandy damytý – jastardyń qolynda.

Ár adamǵa jáne barshaǵa birdeı múmkindik beretin memleketti, ıaǵnı Ádiletti Qazaqstandy bolashaq urpaqqa amanat etý – barshamyzǵa ortaq mindet», - dedi Janseıit Qanseıituly.

JOO rektory kezdesýde QR Prezıdenti qoıǵan mindetter men maqsattardy oryndaýda Ál-Farabı atyndaǵy QazUÝ aıryqsha úles qosyp otyrǵanyn aıtty.

«Memleket basshysy Joldaýynda aldyńǵy qatarly 23 sheteldik joǵarǵy oqý ornynyń fılıaly ashylǵanyn atap ótti. Sonyń ekeýi bizdiń ýnıversıtetimizde ashyldy.  Atap aıtqanda, Máskeý ulttyq ıadrolyq zertteý ýnıversıteti jáne Soltústik-Batys polıtehnıkalyq ýnıversıteti. Buǵan deıin Ystambul jáne Bishkek qalalarynda Prezıdent qatysýymen QazUÝ fılıaly ashylǵan bolatyn. Aldaǵy ýaqytta F.M.Dostoevskıı atyndaǵy Omby memlekettik ýnıversıtetinde QazUÝ fılıalyn iske qosý josparlanyp otyr», - dedi bilim ordasynyń basshysy.

Kóshbasshylyq kezdesýde Janseıit Qanseıituly oqý ordasy zertteý mártebesine ıe bolǵandyqtan ǵylymı áleýetti damytýǵa ýnıversıtet basa nazar aýdaratynyn aıtty. Sondaı-aq stýdentterdiń emin-erkin bilim alýy úshin ýnıversıtette atqarylǵan jumystarǵa toqtaldy.

Sózin qorytyndylaı kele Janseıit Qanseıituly stýdent-jastardy ýaqytty tıimdi paıdalanýǵa, jıi kitap oqýǵa úndep, barshaǵa ortaq beıbit ári jarqyn bolashaq qurý jolynda kúsh biriktirýge shaqyrdy.

Kezdesý sońynda latyn grafıkasyna kóshý máselesi, Qazaqstannyń ózge memlekettermen yntymaqtastyǵy, qoǵamdaǵy turaqtylyq týraly birqatar suraqqa jaýap berdi.