Eń aldymen, óńir basshysy aýdannyń Qazyǵurt aýylyndaǵy "Bolashaq" shaǵyn aýdanynan boi kótergen 16 páterli 4 turǵyn úidiń kiltin páter qojaiyndaryna tabystap, qýanyshtaryna ortaqtasty. 20 az qamtamasyz etilgen otbasy men jetim balalarǵa tabystalǵan úilerge bolashaqta, jalpy sany 64 otbasy kóship baryp, qonys toiyn toilaityn bolady.
Aýdannyń 90 jyldyq torqaly toiynda salaýatty ómir saltyn ustanatyn turǵyndar úshin de bul kún qutty boldy. Dál osy shaǵyn aýdanda 210 orynǵa arnalǵan «Jeńis» deneshynyqtyrý-saýyqtyrý kesheniniń qurylysy aiaqtalyp, paidalanýǵa tapsyryldy.
Saltanatty sharaǵa kýá bolǵan J.Túimebaev taiaýda ǵana álemdik arenalarda aýdannyń shyqqan sharaphanalyq Erjan Jomart, Abdýlla Erkebulan syndy saiypqyrandardyń topty jaryp shyqqanyn mysal etip, Qazyǵurttan olardyń jolyn qýyp, kúlli qazaqtyń namysyn qorǵaityn órender shyǵýyna tilektestigin bildirdi. Bul tilegin Janseiit Qanseiituly osynda kelgen jas sportshy balalarmen kezdesýde de aitty. Bolashaq jeńimpazdardyń keleshekte Qazyǵurttyń namysyn ǵana emes, oblysymyzdyń, respýblikamyzdyń atyn shyǵarýda aianbai eńbek etip, óner kórsetýi qajettigin jetkizdi.
Munan soń, jinalǵan kópshilik osy aýyldan jańadan jumysyn bastaǵan «Óner» mektebiniń saltanatty ashylýyn tamashalady. 100 orynǵa laiyqtalǵan óner ordasynda endi Qazyǵurttyń ónerpazdary oblystyq, respýblikalyq óner baiqaýlaryna daiyndalatyn bolady.
90 jyldyq mereke aiasynda óńir basshysy bastaǵan top aýdanda ashylǵan etnoaýylda bolyp, aýyl sharýashylyǵy ónimderi qoiylǵan kórmeni tamashalady.
Túrkistan oblysy ákiminiń baspasóz qyzmeti
